Tuornu a ra scola

Tuppi, Tuppi! - Chin'è? -Mi cce vuliti
Assittatu ccu bbue supra 'ssi vanchi?
Vue 'na mullica tutti quanti siti;
Iu tiegnu 'a varva e ri capilli janchi;
Ma me criscivi a cchista stessa scola
Mo su' ttant'anni... 'U tiempu cumu vola!

E nnummu ve criditi ca nun tìegnu
‘Nu pizzicu de sale a ru ciarvìellu !
Si vìecchiu tuornu ccà, cce torn'e bbiegnu
Cà viàtu chi torna qquatrarìellu!
Vita cchiù bella e cchiù ffilice 'un c'è
Dde quannu nne 'mparàmu l'abbeccè!

Trasu? -Trasiti! -'E stesse cose care:
I vanchi, 'e segge, 'u posticiellu miu…
Ve guardu 'm pacce e bbìdere me pare
Ppe’ d'ognunu de vue 'n'amicu miu.
Tu certu si'... Ttumasi. Tu... Grabbiele.
Tu..Ciccu. Tu... Rusariu. Tu... Michele.

Ma cumu? Cica nn 'èramu pirduti,
Tutti 'sse bbanne bbanne e sparpagliati;
Chine 'nzuffunnu e cchine mmuppa juti,
Chine filici e cchine spurtunati.
E mmece simu ccà! Bbielli, viniti,
Ve spalancu 'ste vrazza a cchiù ca siti.

Cchi ttìempi chiri nuostri chi su' stati !
Quannu niscìemu 'e ccà paria 'nna fera!
Parìemu tanti diavuli 'ncarnati!
Parìemu tanti avanzi de galera!
Parìemu 'na nigliata de rinnuni!
Ah, ristati si fòramu guagliuni!

De juri dduve mo cc'è cchiru mazzu,
Cc'era, a ri tiempi mie, 'nu tavulinu.
Chiudu 'nu puocu l'uocchj e llà bbicinu
Te viju 'nu muscune, 'nu mustazzu,
E ddue prunelle duci cumu mele:
E' ru maestru miu! Ddo' Mmanuele!

Guardàti puru vue. Nu' ru viditi?
E' 'nnu gigante e dduve nnue è bbinutu
ppe' nne purtare a ttutti 'nu salutu
E ppe' sse stare 'nzieme a nnue 'nu titi.
Vasàmule, cumpagni, de luntanu,
Cumu 'na vota, tutti quanti 'a manu.

'A manu chi a ra facce 'na carizza
Nn'ha ffatta, si nne l'hamu mieritata;
'A manu chi 'na rìcchja nn'ha ttirata
Quannu nu' ssimu juti de capizza;
'A manu chi pigliàu ttutte 'ste manu
E ll'aste nne 'mparàudi chianu chianu.

O mastru, quantu bbene nn'hai vulutu
E qquante cose bbelle nn 'hai 'mparatu!
ppe' ffigli a ttutti quanti nn'hai tinutu,
e nnue cumu 'nu patre t'hamu amatu.
Rèstate sempre ccà! nun ti nne jire
O t'arrucchjamu nummu pûe fujire!

Ma propriu intra 'stu mentre, oh cchi ppiccatu!
Ppe' mmala sorta mia, me rispigliai.
'Ssu paradisu me l'avìa ssunnatu
E re lacrime all'uocchj me truvai.
Già me l'avìa dde figurare: tu
Dicìe ch'arrieti nu' sse torna cchiù!