Contatti

mercoledì 30 giugno 2010

'A musca e ru voi


‘A musca e ru voi


Disse ‘nna musca a ‘nnu gigante ‘e voi.
- Ma cumu? Si’ cchiù fforte de l’azzaru
E ssenza dire oi,
Te fai mintire ‘u juvu  ‘e ‘nu quatraru?
Iu, s’avera ra forza
Chi tìeni tu, l’avèra spracillatu!
L‘avèra spissicatu!
- Parole! Ccu ‘ssu facci d’ammazzatu,
Chi m ‘hadi ‘mpasturatu
E nnu’ mme fa jjatare,
Dimme, cchi ppuozzu fare?
- E re corne ‘un ce l’hai
Mu l’usi ppe’ ppizzutu?
- L‘haju; ma chille sèrvenu
Ppe’ mmustrare a ra gente
Ca sugnu sulamente ‘nu curnutu -.

'u cane e ra cagnola

‘U cane e ra cagnola


‘Nu cane a ‘nna cagnola
Chi nne sapìa dde cchiù
-Dìceme - disse – tu
Chi juta si’ a ra scola,
Ppecchì quann‘eru povaru e ‘ncamatu
‘Ssu cane chi mo passa m’ha aiutatu
E mmo chi m’haju fattu ‘na furtuna
Me vide e ccumpidenza nu’ mme duna
- Ppecchì? Ppecchì ad avire
Piatà nun ce vo’ nnente;
Ma ppe’ ‘un tinìre mmidia
‘A cosa è ddiffirente -.

lunedì 21 giugno 2010

Cunigli

Cunigli

-Mammà, dicitime
Ppecchì ‘a patruna
erva a strafrìjere
Moni me duna?

E ppecchì ‘u sabbatu
De sulla asciutta
E dd’agliu tènnaru
Sempre m’abbutta? -

-Ppecchì, ‘a duminica,
Quannu cummita,
Te vo’ cchiù ttènnara,
Cchiù ssapurita. -

venerdì 18 giugno 2010

‘A vilanza

‘Nu pisciaru,
Casu raru,
Ppe’ bbidìre si cc’è ggustu
A ddunare ‘u pisu giustu,
‘Na matina,
Cchi cummìna?
De ‘na panza de vilanza
Tiràu ffore chiru ‘mbruogliu,
(Quale dire nu’ bbe vuogliu)
Ch‘illu stessu cce avìa mmisu
Pp’arrubbàre supra ‘u pisu.
Nun cuntientu, l’untàu dd’uogliu
E, a ra fine,
Ppemmu giusta miegliu va,
L‘attaccàudi a re catine
Quattru coccia d’unistà:
Dui de ccà e ddui de lIà.
Chira latra de vilanza
Turnàu ‘nsùbbitu ‘mmilanza.

Copparella de mancina
Chi ppe’ bbia d”a ‘mbrogliatina,
A sse stare era ‘mparata
D’ ‘a vicina cchiud’azata,
‘Mparu vitte ‘ssa parizza
- Chissu, no! - disse ccu stizza
- Sugnu nata artulucata
E nnun puozzu stare a pparu,
Ppe’ bbulire ‘e ‘nu pisciaru,
De ‘na coppa dispirata
E ‘mbrattata
De fragaglia e de nunnata -.
Ed allura cchi tte fà?
Jetta ‘n terra l’unistà.
LIà ppe’ llà,
se sintìu ‘nnu scatalasciu:
Illa ‘nn‘ariu. L‘autra abbasciu!

‘A matina,
A ra vista ‘e ‘ssa ruina,
‘A cumpagna
Si nne lagna.

L ‘àutra dice: - Te dispiace?
-‘U’ mme sacciu dare pace!
-Ma ppecchì? Ma cumu va?
Ch‘aju perza l’unistà
O ca tu,
Turututù,
Si’ scinnuta e ‘u’ ssagli cchìù?

martedì 15 giugno 2010

L'urmu e ra vite

L 'urmu e ra vite
'Nu pede d'urmu s'era 'nnamuratu
De 'nu pede de vite muscatella;
Ma, vrigugnusu, 'u' ss'èradi azzardatu
Mancu 'e le dire: quantu siti bbella!
'Nu juornu, quannu 'u vientu, chianu chianu,
'E pàmpine de cchiù lle muoticava,
Senza fare a ccapire de luntanu,
'Na canzuna d'amure le cantava.
'A vite, chi sinn'era 'nnamurata,
Filice se sintìa; ma stava ccita.
Avèra ddata ppe' cchill'urmu 'a vita
Ma passare 'u' bbulìa ppe' 'nna spacciata.
'Nu juornu l'urmu, fàttuse cchiù arditu,
Le disse: -Te vulèra ppe' mmugliere -.
'A vite rispunnìu: - si tu sapère
A qquant'anni te vuogliu ppe' mmaritu! -
E ffo' ccussì chi, l'ùottu de frivaru,
'A vite e ll'urmu nuostru se spusaru.

venerdì 11 giugno 2010

'A vigna

‘A vigna

Pòvara vigna mia,
Cumu te si’ rriddutta!
Zibbillu e mmarvasìa
Si’ spampinata tutta!
E ddire ca ‘nu juornu,
Quannu campava ttata,
Eri de stu cuntuornu
‘A vigna cchiù ppriggiata
E mmo, povara vigna,
Te mancia rà gramigna.
‘Na vota ccu ri rappi chi nne dava
‘Nnu sulu saramientu,
Inchjemu ‘nu parmientu e ‘nn’avanzava.
Moni te guardu e ccianciu:
Llà ssupra si’ annigliata,
Ccà ssutta si’ bbrusciata.
- E ra curpa è ra mia? -
Disse ra marvasìa
- O de vussugnurìa chi l’hai dunata
A ‘nn‘anima dannata ‘n culunìa,
Spraticu, vatularu, gabbamunnu,
Chi a r’alluongu ogned’annu nn‘ha pputata,
Chi s’è ‘ncrisciutu de zappare funnu
E ‘u nn‘ha ddatu nnè ssurfa nnè ssurfatu?

martedì 8 giugno 2010

Pitture - Belletti.0

Pitture
-Quantu te custa ‘ssa mullìca ‘e pittu
Chi te strichi a ra facce ogne mmatina?
- Cientu lire pped’ogne stricatina -
Stricannuse de cchiù, Rosa, m’ha ddittu.
- E ‘un te pare ch‘è ppropiu ‘nu dilittu
Ppemmu unu ‘e ‘ssu muodu i sordi spenne?
- Se vide ca nu’ ssai quantu me renne!


Glossario:
pittu: trucco; belletto.
stricare: strofinare; passare.
spenne: spende

Traduzione
Belletti.

Quanto ti costa sto poco di belletto
 Che ti passi sul viso ogni mattina?.
- Cento lire per ogni passatina-
Truccandosi di più, Rosa m'ha detto.
E non ti pare ch'è proprio scorretto
Se uno i soldi in questo modo spende?
- Si vede che non sai quanto mi rende!


'A musca e ru voi

‘A musca e ru voi

Disse ‘nna musca a ‘nnu gigante ‘e voi.
- Ma cumu? Si’ cchiù fforte de l’azzaru
E ssenza dire oi,
Te fai mintire ‘u juvu ‘e ‘nu quatraru?
Iu, s’avera ra forza
Chi tìeni tu, l’avèra spracillatu!
L‘avèra spissicatu!
- Parole! Ccu ‘ssu facci d’ammazzatu,
Chi m ‘hadi ‘mpasturatu
E nnu’ mme fa jjatare,
Dimme, cchi ppuozzu fare?
- E re corne ‘un ce l’hai
Mu l’usi ppe’ ppizzutu?
- L‘haju; ma chille sèrvenu
Ppe’ mmustrare a ra gente
Ca sugnu sulamente ‘nu curnutu -.

domenica 6 giugno 2010

Scupune - Scopone

Scupune

‘Nu gallu e ‘nna gallina,
‘Na vurpe e ‘nnu liune
Se stàvanu faciennu, ‘na matina,
‘Na partita a scupune.

‘U gallu, a pprima data,
Disse: - Gallì, vincimu!
Ccu re carte magnifiche ch‘avimu
‘A vittoria è accirtata!

Cala settoru - Sùbbitu –
M’’a vurpe se lanzau:
- Sette e ttri ddece! – Dìssedi
E ccu ru Rre pigliau.

Disse ru gallu: - ‘U’ ‘mpòrtadi!
Cc’è cca sette bbastuni –
E ra gallina: - Jèttalu! –
Ccu ssette spate s’ ‘o mmuccau ru liune.

-E mmò? - Nnu’ t’abbilire!
Tìenu pprimera ed oru,
Hau ccarte ed hau ssittoru;
Ma nun pùotu bbincire!

Cce su’ e scupe... - Spèracce!
Si de ‘ssu passu jamu,
Ccu cchille m’assicutanu
Quantu cchìù nnue spiramu! -

giovedì 3 giugno 2010

'u gallunnianu - il tacchino


‘U gallunnianu


Tu cridi - me disse ru nnianu
- Ca sugnu dulente e scuntìentu,
Ppecchì mmo chi manca ru granu
Me fazzu ogne jjuornu cchiù llientu?

   Te sbagli, cumpagnu! Iu vulèra
Mmu l’ossa me rèstanu ‘ncuollu;
Armenu ccussì mme sarvèra
Dde ‘ncuna turciuta de cuollu!


glossario:
lientu :magro
''ncuollu : addosso
'turciuta : girata; torta ( da torcere o turcire - cs: torcire_)