‘U sirragliu
Se ‘ntìseru ttri ccùorpi de battagliu
E, ssùbbitu, davanti a ru patrune,
‘Mpalati, cumparìeru dd’ ‘o sirragliu
‘Nu ciucciu, ‘nu cagnùolu e ‘nnu liune.
-Patrù, cchi ccummannnati? –
Addimmannàu ru ciucciu, ccu nnu ragliu.
L‘àutru le rispunnìu: - V’haju chiamati,
De pressa, ppe’ bbe dire
Ca stàmu ppe’ ffalire...
-Ddiu nne scanzi! S’è ppropiu deccussì –
Dìsseru cchiri tri.
- Vidìmu cumu s’ha dde riparare.
Avìmu de strincere,
Avìmu ‘e dijunare;
Ma mo se tratta ssulu de vidire
‘Ssu sacrifizziu chine l’ha dde fare
Si tuni, tuni o tuni... -
Se ‘ntise ‘nnu ruggitu: - Ciucci e ccani! -
Pue, forte, ‘nu latratu: - Ciucci e liuni! -
Pue ‘nu ragliu finale: Liuni e ccani! -
