Contatti

martedì 30 marzo 2010

‘U cavallu e ru tavanu



   De scuma paru paru cummigliatu,
‘Nu cavallu vulava ccumu vientu:
Ma,‘ntantu, chiru facci d’ammazzatu
De cavarcante ‘ud’èradi cuntientu!

Ccu ddui spiruni luciti d’argientu,
I famici l’avìa qquasi grubbatu;
Ma, cchiù cchìllu curria, cchiù ru dannatu
Nu’ re dunava ‘nn ‘àcinu d’abbientu!

Tavanu chi ad atizza de spirune
‘U sangu se sucàva de l’affrittu,
-Basta! - disse - ‘U’ ru vidi, lazzarune,

Cà ‘u criepi ccu ‘sse bbotte chi le ‘mpacchj?
- E ttu cchi cc’intri? - cavarcante ha ddittu.
- Cc’intru ca si me cùogli me scamacchj!  


Glossario:

scuma: schiuma
paru paru: completamente
cummigliatu: ricoperto
grubbatu: bucato
acinu: attimo



domenica 28 marzo 2010

'U bannu - Il bando

‘U bbannu

-Gallì, ppecchì dde nuovu –
Disse ru gallu - canti?
‘U sanu  tutti quanti
Ca fai ‘ssa pesta d’ùovu!
- Gallù, mìntete ‘n mente
Ca senza ‘na cantata
‘U sse cunchjude nnente.
E ssi quintinamente
Nun prìedichi a ra ggente
Ca l’uovu è dd”à jurnata
Te resta ‘m magazzinu
E ffà ru pulicinu! -

giovedì 25 marzo 2010

'e due mulette - Le due mule

‘E due mulette

‘Nu ciucciaru avìa ‘nnu paru
De mulette cavalline:
Una, janca, ‘e Catanzaru;
‘N’àutra, niura, ‘e ‘sse marine.

Chilla niura, marinota,
‘U’ ‘ssapìa mmancu ragliare;
Mmece, ‘a janca, senza dota
Se putìadi maritare.

‘Ntantu, ‘a niura era ttrattata
Cumu ‘a meglia d’ ‘a parrocchia;
Mentre ‘a janca, ogne ppalata
Li s’azava rra vurrocchia!

De ‘ssa cosa tanta strana
‘U ppecchì ddittu vulèra.
- Ppecchì ‘a janca è ppaisana
E ra niura è ffuristera! -

domenica 14 marzo 2010

Piscicani -Pescicani



    Ddiu nne scampi,
‘Na matina,
Truoni e llampi,
 Se scatina
‘Nna chiuvuta
Mai viduta.

   Franciscu ch‘hadi all’aria
‘U granu de pisare,
Ppe’ ru dulure ciancere
Se sente e ddispirare.

  ‘E rane, mmece, godenu
E ‘n core fanu festa;
D’ogne ppantanu gridanu:
Ebbiva ra timpesta!

Cumu Franciscu, ciàncedi
Chi tene figli ‘n guerra;
Cumu ‘sse rane, ridenu
I piscicani ‘e… terra!

giovedì 11 marzo 2010

L'uomini e ru passaru - L'uomo e il passero



‘Nu pàssaru, pusatu
Supra ‘nu pede ‘e nuce,
‘Stasira, m’ha ccantatu,
Ppe’ spogu,‘sta canzuna, a mmenza vuce:
-‘Un c’è cchi ddire, l’uomini
Siti ‘na vera pasta ‘e galantuomini!
Fina ch ‘ogne mmatina
Ve fazzu ‘na cisina
De viermi, nu’ bbe dicu
Quantu ve sugnu amicu!
De mie nun c’è ru gualu
E ‘nnu trisuoru valu!
Ma si ‘na vota sula, arrassu sia,
Me cùogliu de ‘ssu chianu
‘Nu cuccillu de granu
Jittatu ppe’ ssimente a ra spurìa,
Allura cchiù bbrigante
Divìentu ‘e Passannante!
‘Un c’è cchi ddire, l’uomini
Siti ‘na vera pasta ‘e galantuomini! -