' A pignata

 'A pignata è 'nu rugagnu

Dduve è d'usu mu tinimu

 Carne frisca sempre a bagnu

 Brodu buonu mu facimu.

Tutti dicenu ca 'un c'è

Mmeglia tazza 'e cunsummè-

6 maggio 22

'A Quadara

 ' A quadara è 'nu rugagnu,

Rame fore ed intra stagnu,

Quannu vulle, ppara para,

Si cce sciala 'nna cucchiara,

Mo trasiennu e rriminannu,

Mo nisciennu e mo stricannu.

7 maggio 1922

Cumu me viestu?

- Cumu me viestu?

- Cumu vue tu.

'mpirò fa priestu

- Me viestu blu?

-Oie se suda, 

Vestete nuda!

8 APRILE 1930

' U tilefunu

 ' U tilefunu è 'nnu 'mmutu

Chi  'u' simiglia a ru nustranu

 Ed è fattu 'nu salutu 

Ppe' mannare de luntanu:

Ma si 'u' bbo' ra Signurina

Nu' sse trase a ra cabina!

3 maggio 1922

Donna ginirusa

 M'ha ddittu  mastru 'Ntoni

' A giuvintù de moni

È ffatta de ricotta.

S'ammucciadi a 'nna bbotta!

Mmece 'sta vecchiarella

De pasta antica è ffatta;

Cummatte, s'arrabbatta

Cchiù de na quatrarella!

13 giugno 1924

Ragazzano

 Dal quindici febbraio al trenta maggio

Del millenovecentoventidue

Stette Butera in questo eremitaggio

Per meglio ritemprar le forze sue,

Venne malato in quel di Ragazzano

 E se ne ritornò vegeto e sano.

Sia benedetta l'ospital dimora

E la Padrona ed il Padrone  ancora.

'U Furnu

 È  ru furnu 'nu limmune

 Supra sutta rivutatu, 

 Quannu è  bbuonu quadijatu,

 De na speggie de purtune

 CCi se 'mpila para para

'Na pardiu longa de pala.

5 maggio 1922

Amure muortu

 Supra 'ste vrazza puortu

'nu granne amure muortu.

 Cumu 'nu passu fazzu, 

' U vasu e me l'abbrazzu.

 'Nzo  duve vaju ragu

'Ss'amure forte e ssantu,

'U vasu ed ogne ttantu

 De lacrime l'allagu.

 Amure, amure muortu

 Ccu mmie sempre te puortu,

 Chi si nne po' scurdare?

Sapisti tantu amare!

 Amure, amure forte

Ccu ttie fin'a ra morte

L'anima mi se strince

ed ogni ppena vince!

 22 maggio 1922

'A Pistola

 'A pistola è nn'arma curta

 Ccu ra canna azzarijata.

A ru grillu 'mparu s'urta

Scaraventa 'nna pallata.

Furgiaru

  Cumpà. ppecchì se ferranu

Ciucci, cavalli e muli?

- Ppecchì? - Ppecchì  nu' rescenu

A 'sse firrare  suli.-

Jazza

  Madonna cumu jazza! Cummigliati

Se su' ri ciaramili. Ppe' ddemane

 Si dura de ccussì muorti gnilati 

I riepuli trovamu tane tane.

      E nno riepuli suli!  'Ntisicati

Ajjamu cristiani e cristiane

 A 'sse catoia dduve su' rristati.

 Senza n'asca de ligna e senza pane!

   ' A notte me sunnai 'na quatrarella 

Chi caminava nive nive, stanca

 Scapilli, sula sula e 'n camisella.

  Tutt'a 'na vota catte a manu manca

 Diciennu sulamente:  Mammarella

E ll'attirau cchira nivera janca!

 7 maggio 22

Orfanella

  Cchid'aria annuvulata!

'A terra è ffridda e mmuta...

Quanta nive è caduta!

Me sientu puru l'anima 'nchiatrata!

'U cielu  cchiù sse scura!

' A cerza è spampinata! 

E sta  neglia gnilata

Me pisa cumu 'n core 'na spintura !

 Visca ru vientu a 'ss'uorti.

 Sugn'orfana ristata,

 Culinuda e 'ncamata...

Morte, cchi aspietti cchiù mmu mi nne puorti?

 Ragazzano, 16 aprile 1922 (Pasqua)

I cani soci

  Fuorzi pecchì dde pinna eranu nati

Zerti cani 'ncamati

Passavanu ppe' tanti littirati...

 Cridiennuse de l'autri cchiù struiti

Cchiù ggappi e cchiù squatriti,

Penza, ripenza e ppenza

Pinzaru dde furmare

'Na liga tra de illi, a 'nn'accurrenza 

Ppe ss'ajutare.

I cani d'autra razza eranu scrusi,

 Cumu tanti rugnusi,

Doppu 'ss'affruntu, chilli

De pilu,  ppe'  ddispiettu,

'A  pigliaru dde  piettu

E  nne ficeru 'n'autra tra de illi.

 I cani de pagliaru

 De mmidia se pigliaru

 E nn'autra nne furmaru.

 E ccussì, se capisce 

Ficeru ll'autri cani

 Ma sempre tra de illi e mai tra strani.

A qquantu mi se dice

'A razza mo è  ffilice...

'Mpatti, 'na  sira tardu, a 'nna vinella

N'errama canicella

Stava rinniennu a Ddiu l'ossa e ra pella.

Truvannese a passare

 De llà 'nnu Presidente

 Caninu, s'accustau pped'ajutare

 Chill'anima dulente. 

Ccu ttuttu ch'era scuru,

Capisciudi chin'era a ru languru

E ddisse: -Pue  cripare, nun t'ajutu!

S'appone ru statutu!

- Sarvame, Prisidé, Nu' sugnu morta 

Ma piennu de nu filu..

- E a mmie cchi mmi nne 'mporta?

Tu si' dde pinna ed iu sugnu de pilu.

Ppe' Rusarinu Custanzu

 Quannu, l'haju davanti,  m'affruntava

A brazz'aperte 'ncuntra me vinia;

L'anima e re prunelle le lucia

 A ccu ru core' 'n manu m'accramava.

Ccu 'nna guardata sula chi me dava

s'addunava ru tiempu chi facia;

E ss'era colarusu s'affriggia

e s'era allegru si nne cunzulava.

E mmo? Mo, puru mo, si 'e Rivintinu 

Passu  a ri chiani  de Dicollatura

 Guardu a mmajorca simminati e a llinu,

Eccute ca te viju a Rrusarinu

 Azare 'u marmu de 'na sipurtura

Ppe' mme currire, risule, vicinu.

Se scivula

  Cicciu Gianani ogne matina passa

'Ssu corzu corzu ccu 'na pilirussa,

Cicciu fatiga ppe' 'un pagare  tassa!

10 gennaio 1927

Salisburgo

 'Nu Capurale  ch'ha ri suonni 'nquieti

Ccu ru  Furieri sue s'èdi affruntatu

L'ha dittu: - Cammirà , stamune quieti!

Sientu 'nu malu fietu de vrusciatu.

Mo chi s'è 'ssa'utru vientu scatinatu,

A meglia cosa è mu turnamu arrieti, 

Si nno, 'ssu graniciellu ch'hai chiantatu

Me spagnu ca 'sta vota nu' ru mieti|!

- Ma cumu? Fin' a mmo  nu' mm'havie dittu

ch'arrieti ad ogni ccuostu nu' sse torna?

E mmoni deccussì marci dirittu?

 Chi Ccapurale si', quannu a na gorna

d'acqua t'affuchi, cumu 'nu cuscrittu?

Mo, vue o nu' bbue , t'hai de rumpire 'e corna!

-

Carità

 

L'amure e ri juri

 

Si saluta romanamente

 'U salutu  rumanu

Chi te fazzu, a re vote, ccu ra manu

'U fazzu sempre ccu' nnu scopu sulu:

Ppe' tte dire: va piglialu a ru culu.

3 aprile 1924

Omissioni.

 

Sant'Antoni

 Sant'Antoni

Ieri, prima mu parti, o Donnu 'ntoni,

L'aguri me scurdavi de te fare;

Unu, ma grande, ti nne fazzu moni:

Te pozze ra Madonna 'mprosperare.

V. Butera

12 giugno 1925

Tannu e mmo

 Quannu  suliemu jire cummigliate,

'U miedicu,  ppe' nummu se vidia

'U 'nniestu  supra 'e vrazza nne facia.

Mo chi juamu spogliate,

Ppe' nummu nni se vide, iu pienzu e ddicu

Ca l'avera dde fare a ru villicu.

 

12 marzo 1929

Signale e postu pigliatu.

 

Lacrime 'ntirissate.

 

A gallina e l'oca

 

'ngegnu cupu e mmente umana 1-2

 

Vermi all'assalto.

 

A Pontano Ddon Mmattista

 

A vite e l'uogliu

 

Licinziata a ra spagnola

 

L'aruculu

 

Gente vecchia e gente nova

 

U ragnu e ru rede

 ‘U ragnu e ru rede

De Diu ccu’ ru cumpùartu

Ieri matina è mùortu

Don Pietru Cusintinu,

‘Nu vìecchjiu nuvantinu

Càrricu de cuntànti

Fatti ccu’ ri briganti.

Affrittu, affrittu forte

‘u nipùte ha cchjiudùtu

‘e finestre e re porte;

de nìuru s’è bistùtu.

E mo ciance a jiurnàta

Chiru povaru nannu a quannu a quannu

E ‘a rroba l’ha llassata.

‘Nu ragnu, a nnu cumpagnu

Chi saglie muru muru,

dice: - Ppecchì ‘stu scuru? –

-Mah, ppe’ ru luttu strittu

De ‘stu povaru affrittu

Chi ‘un bo’ ppemmu se vide

Cumu ‘u core le ride! –

De ssu Passu.

  De ssu passu

Ogne bota chi passu

campìju, guardu e ddicu:

- Pìecure lente e ppìecuràru grassu! –

Si jamu de ssu passu,

va vide ad annu nùovu

cchi ccaspìta cce trùovu! –

-Cce trùovi ‘nu vulìce-

‘u cagnùolu me dice.

L'amicu fintu

 Tu si', ccaru  Jinnaru

De core ppe'  ddaveru;

Tu si' 'nn'amicu raru; 

Tu si' 'nn'amicu veru.

'Un tieni dente amaru.

'Ud'hai malu pinzieru.

Si' ttantu bbuonu e ccaru,

Ma 'u' ssi'... tantu sinceru.

 E cumu tanti e ttanti

Chi paru bbuoni e qquieti,

L'amicu fai d'avanti

e ppue parri.... d'arrieti!

 Ragazzanu 12 aprile 1922

Funtana sincera

 De funtana 'na cannella

'Ncumpidenza a 'nna spurtella

Dimannau: Si cce pruvèra

'Un te pare ca t'inchièra?...

- No, cumpagna! Sugnu tutta

Sprantumata, rutta e strutta,

Ppe' dde chiù, sugnu de sprinchi

L'acqua funne e quantu minchi!

20 febbraio 1922

sprantumata: ridotta in pezzi; sbriciolata.