‘A cerza e ru pazzu
Ad unu chi ‘na cerza
fa crìscere a ‘nna grasta
l’haiu diciùtu: -Basta
ccu’ sta fatìga perza.
Ssa cosa ‘u ra cunchjiùdi,
t’abbàca ppemmu sudi!
‘A glianna, se capìsce
ca piglia, nasce e crisce,
ma, nun se po’ fare granne
si nun le duni spaziu
‘e ràdiche mu spanne.
Ah, nun me cridi? E ttuni
‘nu jùarnu ti nn’addùni.
E all’annu s’addunàu
Ca ‘a grasta se cripàu.
Chjiaru e scuru
-Iu sugnu ppe’ ra luce
Chi fa bbidìre ad unu
‘E cose cumu sunu -.
Me dìssedi ‘na vuce.
-Iu sugnu ppe’ ru scuru,
Ccussì, cumu me piace,
‘A gente me figùru. -
-E, si chillu chi vidi
Nud’è cumu te cridi? –
-‘U ra fa nnente. Penza
Ca ‘u munnu edi apparenza!
Dirittu edi ‘u cùoscinu
Ppe’ ll’ùacchjiu ch’è ccicatu,
Ancilu s’è ddiàvulu,
Riccu s’è dispiratu.
