L’Auni e ru lupu

Intra ‘nu vuoscu flttu de carigli
Passa ‘nna diligenza mai viduta;
‘A guìdanu a bbicenna dui cunigli,
‘A tìradi ‘na piecura furzuta.
I passiggieri su’ qquattr ‘àuni janchi,
Muorti de suonnu, ‘mpilurciati e stanchi.

‘E rote, tutte quante digallate,
Càntanu ad ogne ggiru ‘na canzuna.
Vola ru vientu ‘e pàmpine siccate,
More a ppunente ‘u primu quartu ‘e luna.
Ognunu ‘n core ha ra malincunia
De quannu nne fà nnotte ppe’ ra via.

A ra ‘ntrasata, ‘e ‘nu vallune cupu,
Ccu ll’uocchi ‘e fore, li se fice avanti,
Àutu ccussì, ‘nnu santuddiu de lupu
Chi, tale e qquale all’usu d’’i briganti,
Latràudi forte: — Nullu mu pipita,
E ffore i sordi si vuliti ‘a vita! —

L‘àuni, a ‘ssa vuce, ‘nsùbbitu trimaru
E, ttutti quanti, ‘e vurzicelle chjne
De marenghe, d’anella e dde catine,
‘N terra, senza jatare, divacaru.
‘U pratu nne lucìu cumu ‘e matina
Luce a ru sule, affusu d’acquazzina.

Ma mentre ‘u lupu, intra ‘nu tascappane,
Se stava rricugliennu ‘a rifurtiva,
De tutta curza, supra postu, arriva
Dde ‘na turra vicina ‘u miegliu cane.
Scappa ru lupu e llassa abbannunatu
Chiru bbene de Ddiu chi avìa arrubbatu.

Allura succidìu ‘nnu parapiglia,
E cchill’àuni se ficeru liuni.
Ognunu ‘a rrobba ‘e l’àutri mu se piglia,
Nne vidisti capate ed ujjazzuni!
Morza de corne e ccierri janchi ‘e lana
Vulàru ccà e dde llà ppe’ ‘nn‘ura sana

‘U cane, ‘a piecurella e ri cuuigli,
A ‘ssa vista, se ficeru ra cruce:
- Cchid’auni ed àuni! Chissi ccà su’ figli
De l’arcissimu! - disseru a ‘nna vuce.
Àutru ca pagurusi e bbonazzuni!
Chissi su’ ttigri! Chissi su’ liuni! —

‘Nu scrùopu chi, de supra ‘na castagna,
Cantava, ccu ru solitu languru,
‘Na canzuna d’amure a nna cumpagna,
‘Ncantata e pperza a ‘nnu cavune scuru,
Suprassidìu ‘nnu puocu e bbiscàu ccupu:
— L’ auni su’ d’àuni quannu cc’è ru lupu. —