Ddon Grabbiè...

Ddon Grabbiè, manciative 'st'aglire
- Sugnu prievite, è bbennari e nnun puozzu-
-  Pruvatilu. Cchi ffa? - Làssame stare - 
E 'mmacante nnucìu ru cannaruozzu.
     -Facitime st'unure: n'anchicella..
Pruvàtila. Cchi ffa?- -Nente..è ppiccatu! -
- Mancu si ve manceravu 'na fella
De logna o 'nu cusciùne abbuttunatu!

Spàrtere gualu

             E' maiu e re visciòle
Scimmollanu a mazzina.
Paru tante ricchina
De curallu a ru sule.

A prìedula

   Nn'avìa chira bon'anima
De zu Giuànni Carinu 
A chira crozza 'e tumminu
Mente e cciarviellu finu! 

'u suttamanu

'Ntoni De Piru e  Carmine Varrile
avienu, ppe' zert'acqua 'e nu canale,
Nu judizziu civile
Avanti 'u  tribunale.
Ma, ppe' ru dire cume Salumune,
'Ntoni avia ttuortu e Carmine ragiune.
                Contrariamente a quantu capitare
Sòledi sempre, 'u povaru avvucatu
Avìa chiaru parràtu:
- o 'Nto', cce viju scuru.
Vide 'e t'aggiustare
Cà pierdi de sicuru.-
       - A ttie ccussì te pare?
E quantu cce mintìmu
Ca l'atture, sta vota, è cunnannatu?
Chillu chi  nun po' ffare
'U dirittu romanu,
'U fa caru avvucatu
Nu buonu suttamanu.
   E, cumu mpatti, a quantu m'hau ddiciutu,
'Ntoni Roperti dicica ha binciutu.

Forge e furgiari.

Zappa zappa, 'nu zappune
S'era fattu 'nu vuzzune:
Senza pala, senza pizzu,
senza n'ugna de sanizzu.
                Stamatina l'haiu ajjatu
tuttu quantu stracanciàtu:
'N'autra pala, n'autru pizzu,
E cchi mmanicu sanizzu!
                L'haiu dittu:  Don Zappù,
Ma è ru veru ca si' ttu?
- Sissignore!- E chin'ha ffattu
'Ssu miraculu a nnu trattu?
                   - Fo' 'nnu nobile forgiaru
Cujjintaru,
CCu ssiliènza a re ciarviella,
Chi nun  ha mmintutu a pparu
Ccu zu' Ciccu 'e Simintella !
                

Oru a ra patria

    All'umbra de 'ssu granne Rivintinu,
Sempre de luce e dde furtizza faru,
Crisce 'nnu tale piezzu de critinu,
Chi nullu scemu le po' stare a pparu!

'A duminica d'e Parme

 'E Parme su' passate e mme dispiace
Ppecchì nun mm'è rrisciutu,
Cum'avera bbulutu,
Cu ra quatrara mia de fare pace.
  'Nu garamu d'aliva benedittu
Iu cce l'avia mmannatu,
Ma nun se l'ha ppigliatu
Cà 'u' mme vo' bbene cchiù: ccussì m'ha ddittu.
   Vide cchi  mmala sorte! E mmo' cchi ffazzu?
Me scannu? Mi nne partu?
Me palìju? Me squartu?
O me 'mpicu? a ri travi ccu 'nnu lazzu?
   - Gnornònzignore? E' mmieggliu ccu' cchiù ddota
Mu n'autra ti nne truavi
Prima de 'ss'àutru juavi...
Vo' dire ca  t'ammazzi n'àutra vota!-

'Na vota 'Ntoni

'Na vota 'Ntoni quann'era mmarinaru
Ccu 'nna carta de mille
S'appiccicava 'a pippa.
Ma moni, s'è fattu ccussì avaru
 Ca ppe' n'unza e menza de fragaglierìa
Aspettadi mu vascianu l'assisi.

Jiennu a ligna

    Ppe' ra via d'i Lupirtielli
Rusinella a lligna va.
A ra banna ha ddui fratielli
Unu cca e ll'àutru llà.

La pisana e la senese

           Sono giunte al mio paese
La pisana e la senese
Alle quali ho dato un saggio
Del mio calabro linguaggio.

Quantu valenu

Disse zinzulu de linu:
 -De 'ssu Piru a dde pinninu
Siti tutti dispirati:
A 'na sarcina ligati
Nu' baliti  'nu carrinu!-

     Rispunniu cierru de lana:
- De 'ssu Piru a ra funtana
De Visora, ricchi siti,
Ma, jungiuti, nu' bbaliti
Tutti quanti quattru grana!

A Michele Pane

Saluto. A Michele Pane. 28 luglio 1943

   Dalle firme desumi che il banchetto
è stato, questa volta, assai ristretto;
Ma con i due Luigi e con Peppino
alla salute del fratello assente
abbiam bevuto ripetutamente
di Pontegrande e di Conflenti il vino.

V. Butera raccontato da Umberto Stranges

Salivamo a volte fin sulla montagna di Riventino per raccogliere funghi nel bosco.
E ci sentivamo felici di vivere all’aria aperta e spensierati.

Umberto Stranges e Vittorio Butera

Risposta

    

                         Gnornò! 'nu littiratu
nun c'è cumu Carusu.
Ma moni s'è spagliatu
e cume, de pirtusu!
Pecchì 'nu cujjintaru
ppe' ttantu 'u' se spagutte;
e mancu ppe' 'nna vutte
e né ppe'  'nnu cillaru!
     Si t'è ristatu 'n canna
'nu bicchiricchiu asciuttu,
è statu ch'Arianna
se l'ha bbivitu tuttu!
Mo' stamu vinnimannu
e , si vo  Ddiu, a Natale
'nu jascu ti nne mannu
de chillu de Vitale!

Promesse. Botta (scrive Caruso)

Botta (scrive Caruso)

  C'era 'nu  pitinusu
chi, 'mparu l'accurria,
a Battista Carusu
ppe' cunsigli curria.
'Nna vota a 'ssu mischinu
dissi de me mannare
'na vummula de vinu;
ma sempre ccu pagare.
Edi passatu n'annu
e nnu' m'ha  cchiù scrivutu
ppe' ru cacacchiu avutu!
E  chissa fu' ppaggura!
Amicu cujjintaru,
hai fattu 'na figura
de veru cacaturu!