Vampili (lampi)

Vampili


Chi succidèra si de cc’a ccent ‘anni,
‘Stu manuscrittu miu vitupiratu,
Cadèra ‘n manu a ‘ncunu varvaianni
De viecchiu littiratu?

‘A capu sana sana cce mintèra
Ca, mussujannu stuortu, ccu rraggiune,
‘Sta sintenza giustissima sputèra:
- Cchi cciucciu e cchi tturdune! —

‘St’avantu, doppu mùortu, iu nu’ ru vùogliu
E ppe’ cchissu, de mo, cchi ppigliu e ffazzu?
‘A carta ch’haju scrittu, a ffùogliu a ffùogliu,
De ‘stu missale strazzu.

E mmi nne siervu ‘a pippa mu m‘alluma...
Ha dd’essere ‘na cosa troppu fina
Vidire pippa e ccarta jire ‘mpuma
Matina ppe’ mmatina!

E re pippate rìegulu mu quannu
Me porta Ddonnu Janni l’uogliu santu,
(Quantu cce po’ bbulire? ‘Ncun‘atr’annu?)
Sugnu all’urtimu cantu.

Ccussì ra gente nu’ po’ ffare a mmenu,
De mie parrannu e dde ‘sti canti, ‘e dire:
Si ‘ud’àppe ccapu a ri ffigliare, armenu
Nn ‘àppe a ri distruggire...

Haju ‘ncignatu, sai? Ma stamatina,
Mentre ‘nu fuogliu de ‘nu pizzu ardia,
Me sunì jutì l’ùocchi a ‘nna quartina
Chi parrava dde tie, billizza mia.

Haju lijutu. ‘A vampa s’è ffinuta.
Ma ‘n ‘àutra ‘n core mi si nn ‘è allumata.
‘Na lacrima de ‘ll‘uocchiu m’è scinnuta.
‘A pippa m’è ccaduta e ss’è astutata...

Glossario:
Varvajanni: barbagianni
mussujannu stuortu: storcendo il muso
ciucciu: asino
'mpuma: in fumo
appe:ebbe
strazzu: strappo
Haju ‘ncignatu: ho iniziato
pizzu: lato
ardia: bruciava
pippa: pipa
astutata: spenta