Santu Larienzu ( San Lorenzo)

Santu Larienzu

Vampe luntane, frugulùni pazzi
Chi de l’ariu scinniti mazzi mazzi,
Jacchère russe, lingue de sirpienti,
Scicille d’uoru, capitìelli ardienti.

Cchi siti? Cariole? Anime ‘n pena?
Frinci’ russi de trena?
Ppecchì ‘ssa pressa? ‘Ncuntra a cchine jati,
Fujìennu cumu diàvuli dannati?

Travi de fuocu. Ppe’ ru cielu muti
Passati a ddui minuti!
Passati cumu cca ‘sta vita scura,
Ch‘a mmalappena ‘nu surruscu dura.

Chine v’alluma? Quale mai distinu
Ve mìntedi ‘n caminu?
Quale manu putente ed ammucciata
V’astuta a ra ‘ntrasata?

‘Na vampa... ‘N’autra... Tra de mie: Cchi ffu?
Dicu — e ‘u’ bbe viju chiù.
Me pariti, a ra luce e a ra distanza,
‘Nu suonnu d’uoru, fattu ‘n quatraranza.

E bb’addimmannu: — Vi nne ‘mporta nnente
De nue, pòvara gente? —
Me rispunniti; — Deccussì lluntane,
Chine cce penza a re spinture umane? —

Glossario:
Vampe: fiamme
fruguluni: lampi
Jacchèra:tizzone acceso, fiaccola
Scicille: scintille
capitielli: alari
cariole: lucciole
frinci: nastri, scampoli
'ncuntra: incontro
jati: andate
fujiennu: fuggendo
surruscu: sussurro, lampo
alluma: accende
ammucciata: nascosta
a ra 'ntrasata: all'mprovviso
pressa: fretta
minte(di): mette
quatraranza: fanciullezza
addimmannu : domando
spinture:sventure