Canta, pueta

Canta, pueta!

—Sempre chi tu m ‘assisti e mme cunzuoli
Ccu ‘ssa sunante, armuniusa vuce;
Sempre chi ‘ntuornu a mmie libbira vùoli,
Lèggia me pare dde ‘sta vita ‘a cruce!

E cchilla, Musa mia, chi ‘ncuollu puortu,
De tantu tiempu, è dde ccussì ggravusa
Chi, si ‘u’ ffora ppe’ ttie, crìdeme, Musa,
A ‘st‘ura certamente fora mmùortu.

Cà cchiù dde ‘sta vicchiaia chi s’avanza,
Me pùotu ri duluri e ru piniju;
Eppuru de luntanu si te viju,
Mi s’àpira ru core a ra spiranza.

-‘U sacciu, ‘u sacciu, ca nu’ ssi’ ccuntientu
E cca ‘nu vunnu t’è qquagliatu ‘n core;
E’ ttantu chi cantare nun te sientu:
Canta, Pueta, chi nun canta more!

L‘anima tua se gira e sse rimina
Cum’unu chi ‘un po’ nnèscere a ru chjanu;
Sì ‘un tieni vuce cchiù, damme ‘ssa lira:
‘A tuoccu iu, ccu ‘sta trimante manu.

- Si tu ccussì mme parri, o suoriscella,
Nova ‘na luce ‘n core mi s’alluma;
Torna ra vita a rridere cchiù bbella,
‘Nn‘aria d’amure ‘na vampata fuma.

A ‘sse parole tue, Musa, me sientu
Martillijare ‘u core senza posa
E llà. dduve murìu ll’urtima rosa,
Nne vidi’ rijurire‘n ‘àutre cientu.

‘Na musica de viersi, appassiunata,
Rumpe ru velu a ra malincunia;
Squaglia ra nive all’anima ‘nchiatrata;
‘Mpoca ru sangu de ‘sta vita mia!

Famme cchiù llìeggiu! Sàglieme a ’nn’atizza
De dduve ‘u’ sse po’ jjire cchiù lluntanu!
Pòrtame finu a ttie. Fa’ ‘ssa prudizza!
Pròjeme, Musa, pròjeme ‘na manu!

Cala ‘sse trizze. Sciunne ‘ssi capilli,
Chi ‘n suonnu sulamente te vasai!
Si me pùorti ccu ttie sin‘a ri stilli,
Te cantu cose nu’ ssintute mai!

Vulàmu ‘nsieme! Fari matutini,
Pàrenu ‘ss’uocchj chi null’uocchju vince!
Jamu luntanu! All’urtimi cumpini.
Dduve l’amure l’anime suspince!

E llà, ppirduti intra ‘na neglia d’uoru,
‘Sta vita cce passamu chi ‘nne resta;
E mmu crisce ppe’ ll’autri ra furesta
Gàrami virdi e ppàmpine d’alluoru!

Glossario:

leggia :leggera
'ncuollu : addosso
gravusa : pesante
piniju: dolore
squaglia : scioglie
'nchiatrata :gelata
projeme: porgimi, dammi
trizze: trecce
garami; rami