Vientu de pustirata (vento autunnale)

Vientu de pustirata

Vientu de pustirata ch‘intra ‘st’orta
Àliti forte e ll’àrvuli virghiji,
È ggià dicembre ed ogne ccosa è mmorta!...
Cchi aspietti ancore mu me purviriji?

Vientu de pustirata, mentre gridi
Pped’intra ‘ssi cavuni dirrupati
Struppella puru i gàrami siccati
Dduve l’aggielli ficeru ri nidi.

Vientu de pustirata. E’ ffatta janca
‘A pampina ‘e ‘sta cerza sulitaria.
Ppecchì, ccu ‘nna jujjata, a ddestra e a mmanca,
‘U re spirnuzzi a capillera all’aria?

Vientu de pustirata. Intra ‘stu core
Purtava a tiempu ‘na spiranza cara;
Ma mo s’è ffatta cumu ruta amara
E ssenza posa me turmenta ancore...

Vientu de pustirata, e ttu ‘sta ruta
Vòlala ‘nn ‘aria ccu re morte cose:
Fa’ mu se perde ‘nsùbbitu junciuta
A ri nidi, a re pampine, a re rose!

Glossario:

intra st'orta: dentro quest'orti
Aliti: soffi
arvuli:alberi
virghiji: muovi con furia (da virgulijare: agitare)
purviriji: alzi in volo (mi porti via)
cavune: burrone
struppillare: distruggere
garami: rami
cerza: quercia
jujjata : soffiata, soffio, raffica