Cani e gatti

L ‘acqua e ru fuocu ‘u’ fficeru mmai liga.
Ed iu, te parru chiaru,
A ffare l’apunaru
Ccu mmie cce pierdi ‘u tiempu e ra fatiga.

Si’ ‘nnu bbuonu quatraru;
Ma pari tal’e qquale ‘na bannera.
Ogne bbientu te vota
Ed iu fora ‘nna ciota
S’ancòre cumpidenza te dunèra!

Hai vistu ‘nsieme cani e ggatti? Mai!
Ed iu me sugnu fatta
Tal’e qquale ‘na gatta.
Mentre tu si’ ‘nnu cane... E ccane assai!

Sìecuta ‘n’autra fatta;
‘A mia, cumpagnu. è dde ‘na vurpe astuta
A ttie chi lassi e ppigli
Te dugnu ‘sti cunsigli
Ccussì ‘a fatiga tua nu’ bba ppirduta!

‘A luna ccu ru sule ‘u’ ll’haju vista
‘Ncielu junciuta mai.
‘Mpàrate, si ‘u’ ru sai,
Ppecchì tte po’ giuvare, puru chista.

‘No vota, sé, t’amai;
Ma mo l’amure ‘mpunnu si nn ‘è jjutu
E tte dugnu ‘u spirattu
Cumu a ttant’autre hai fattu.
Ma cumu ccu ‘stu chjuppu ‘un t’è rrisciutu!

glossario:
bannera: bandiera
ciota : stupida
cumpidenza: confidenza
apunaru: calabrone
'mpunnu: in fondo