‘E furmiche e ru voi

‘E furmiche e ru voi

‘Na murra de furmiche,
Ccu stienti e ccu ffatiche,
De ‘na strata a ra rasa,
S’avìa ffatta ‘na casa.
E, ddoppu, chianu chianu,
Fatigannu a jurnata,
L’avìa cchjna de granu
Ppe’ ra virnata.
Ma, ieri, a ra ‘ntrasata,
È’ ppassatu ‘nu voi
E, ssenza dire: oi!
L’ha ssubbissata.
O gente chi t’affanni,
Chi trìbbuli e tte danni,
Sempre, pped’ogne rrasa,
Ppe’ ccriscere ‘na casa,
Penza ca cc’è ‘nnu voi,
De chiru voi cchiù fforte,
Chi senza dire: oi
Distrugge ttuttu: ‘a morte!