Contatti

mercoledì 30 marzo 2011

'A volantina

‘A volantina

   De na castagna
Curcia, sulagna,
Era bbulata,
Chira matina,
Na volantina,
De carcarazza.

   Cumu ‘na pazza,
‘Nn‘aria Iivata
A prima vota
Facìa ra rota.

   Mentre vulava
Ccussì ccantava:
— Chechè, papà!
Chechè, mammà!
‘A libirtà,
 Sta ssulu ccà!

  ‘Na picarella,
Cumu scurau,
— O suoriscella,
Torna — gridàu —
A ra castagna
Dduve si’ nnata.
Màmma se lagna,
T’aspetta ttata. —

Ma cchi tturnare,
Cucurucù!
Sacciu vulare,
Nun tuornu cchiù! —

  Quann‘unu se fà ppica,
De l’autri si nne frica!

martedì 15 marzo 2011

Esodo

- E Stocco?- Chiese il Re.
-Più non lo vedo. Ov'è?

- Da Catanzaro Sala-
Rispose il Podestà
-Partito è per Marsala,
Tre settimane fà.

-Per riveder Peppino?-
Ridendo fe' Vittorio.
-No, per ribere il vino
Delle cantine Florio!

lunedì 28 febbraio 2011

Nullità

A Catanzaro c'erano
due sole nullità:
una l'han fatta Preside
e l'altra Podestà.

‘A furmica e ru gattu - la formica e il gatto


‘Na formica
Disse: — cica
S’edi fattu tantu granu;
Ma, ‘ntramente, intra ‘stu chianu
‘U nne viju ‘na mullica.

Ogne jjuornu
Ggiru ‘ntuornu
‘Nu cùccilu ppe’ ‘nn‘ajjare ;
M’aju voglia de circare!
Cumu nìesciu mi nne tuornu!

— Viramente — Fà ‘nnu gattu,
- Graniciellu si nn‘è ffattu;
- Ma no ggià ppe’ re furmiche:
Ppe’ ‘sse pòvare minniche
‘Un ce su’ mmancu ristate
 Ristucciate, ‘u ddicu spiche. -

— E ppecchì? — Ppecchì è ppassata
‘Na murrata
Niura niura de galline
E re vozze si nn‘ha cchjne! —

mercoledì 23 febbraio 2011

‘U patrune e ru puorcu - Il padrone e il maiale




-Ccu ttuttu ca sì puorcu, senza cuntu
t‘usu riguardi e tte dugnu vrudate...
-  E ppecchì ‘u’ ‘ddici ca ‘stu viernu ‘e scuntu
menze a ssazizze e mmenze a ssupprissate?


mercoledì 16 febbraio 2011

'a catarra e ru primu amure - La chitarra e il primo amore

‘A catarra e ru primu amure



-  Cchi ddifferenza cc’è — pùrichi sai —
Tra ‘na catarra e tra ‘nu primu amure?
A catarra se scorda a ttutte l’ure
‘U primu amure nu’ sse scorda mmai!

domenica 13 febbraio 2011

'u trappitaru e ra ciuccia -Il trappettaio e l'asina


‘Nu trappitaru grassu
Disse a ‘nna ciuccia de cudurzu  lientu,
-‘U dudici ppe' ccientu
M'è fare de ribbassu.
-E ssupra cchi? — Supr’ogne litru d’uogliu
Ch ‘a mmacìna te passu -.
- E mma ppecchì? -
- Ppecchì dde ccussì bbuogliu
Si nno te mannu a spassu.

‘A paglia edi vasciata,
 ‘U fienu va ppe’ nnente
 Ed iu, naturalmente,
 Te calu cchiù 'a misata! -

—Vasciata? Va ppe' 'nnente?
Ma vue cchi mme cuntati?
Se vide cchiaramente
Ca rrobba ‘u’nn‘accattati!

S’è d'uorjiu :‘u’nne parramu!
S’è bbena: e cchì cce accosta?
S’è ssulla: o virde o tosta
Su' d’anni e ‘u’ ra pruvamu!

‘E fave, ‘e tri ccarrini,
‘U sse sa a qquantu vanu
E ddeccussì i lupini
E ddeccussì ‘u nnianu
Lijiti i bullittini
E ppue, patrù, parramu!

-Ma guarda ‘sti sumari
 Quante ciutìe sapiti!
‘U sai ca me pariti
Scrivani de nutari?

Sta bbene! ‘Un te cummene?
E ttu ppecchì cce stai?
A fforza nu’ru sai
Ca nulla ti cce tene?

— Mo, chistu, è ‘nn‘àutru fattu...
— Ed è ‘nnu nuovu pattu!
-E ss’iu nu’ mmi cce adattu?
- Te mannu mo ‘u spirattu —
-            
‘A ciuccia, ppe' ra stizza
Chi le saglìudi ‘n canna,
 Vulia rrumpire ‘a vriglia e ra capizza
Ppe' lle dare dui càuci a cchira bbanna.

Ma pue guardàu bbicìna ‘a pullitrella
‘Nu mise arrieti ammaleppena nata
 E ddise: - Cchi lle dugnu’ sta virnata
Si nu’ ffatigu cchiù a ‘ssa figliulella?

‘A meglia cosa è ppemmu me cuntìentu
Senza nisciuna stupita prutesta
De ‘ss'uttantuottu misaru ppe’ ccientu
Chi, buntà ssua, me resta... –
E ccu ‘nna rivirenza
Disse:— Patrù, faciti
Cumu vussugnurìa miegliu criditi...
(E ra manu de Ddiu ppemmu cce penza!). -










sabato 22 gennaio 2011

‘E corne e ri dinari

    


   De quannu a ‘ssu scaràzzu  cc’è ttrasutu
‘Nu jìencu niuru, vicchiaturu natu,
Massaru ‘Ntoni, ch‘era ‘nnu ‘ncamatu,
 Cumu fo’, cumu ‘u’ ffo’ s’è arricchiscìutu.

   ‘E purcìne all’urdìche hadi jittatu
E re scarpe de sola s’ha mmintutu;
‘Na gamma supra l’autra ha ‘ncavarcatu
E ffuma ‘nnu zicarru ogne mminutu.

    Iu me sugnu ccussi mmaravigliatu
Ch‘a ‘nnu cagnuolu crozzu haju diciutu:
 - Cum‘ha ffattu ‘ssu facci d’ammazzatu? —

   Cagnuolu, ch ‘è ‘nn’arùculu fujutu,
‘A vacca vastardara m’ha mmustratu
 E: — Re corne su’ dd’oru! — m’ha ddiciutu!



sabato 15 gennaio 2011

A fravetta e ru palluttinu - Il beccafico e il pallino

A fravetta e ru palluttinu


A ra cima soprana
De nu pede de ficu milinciana,
Si cc’eradi pusata na fravetta
Cchiù ggrassa de na quaglia
E ccu ru pizziciellu, ntaglia ntaglia,
Grubbava ll’utre de na ficazzana.

Nu piezzu de canaglia
Acchiappa nna scuppetta
De chille antiche a scaglia
E nna bbotta le jetta.

Cade ra fravittella
Ancora menza viva llà bbicinu
Ppecchì nnu palluttinu
L‘è rristatu mpinciutu a re vudella.

-Scilliratu! Assassinu!
Brigante! Priputente!
‘Un t’avìa ffattu nente —
Le dice ra fravetta — e mm’hai ammazzatu. -
                                
   - Ma cchi cce curpu iu? —
   Le fa ru palluttinu.
   - Te cridi ca trasutu’ a ssu stintine
  Iu ti cce sugnu ppe ppiacire miu?

‘A curpa è dde chilllu
Chi tira ru grillu! —

lunedì 10 gennaio 2011

‘A suraca e ru nnianu - il fagiolo e il grano

‘A suraca e ru nnianu


Na suraca screanzata
Intra nente era ‘ncriccata
A ‘nnu pede de nnianu
Chi criscìa mmienzu nu chjanu.

E lli s’ era
Ncatturatu ‘e na manèra,
Do’ pidale a ra bannera,
Ch‘a r’affrittu, ad ogne ggiru,
Le mancava ru rispiru.

- O surà, disse nnianu,
‘U strincìre ccussì fforte!
Ppe ppiatà, fa chjanu chjanu
Ca si nnò me manni a mmorte! –

—‘Un sa’ mmai! Ca cumu fazzu.
Nu’ bbulennu, si t’ammazzu? -
— Se capisce, ‘un te cummene...
Pue, si nnò, chine te tene?