'u trappitaru e ra ciuccia -Il trappettaio e l'asina

‘Nu trappitaru grassu

Disse a ‘nna ciuccia de cudurzu  lientu,

-‘U dudici ppe' ccientu

M'è fare de ribbassu.

-E ssupra cchi? — Supr’ogne litru d’uogliu

Ch ‘a mmacìna te passu -.

- E mma ppecchì? -

- Ppecchì dde ccussì bbuogliu

Si nno te mannu a spassu.

‘A paglia edi vasciata,

 ‘U fienu va ppe’ nnente

 Ed iu, naturalmente,

 Te calu cchiù 'a misata! -

—Vasciata? Va ppe' 'nnente?

Ma vue cchi mme cuntati?

Se vide cchiaramente

Ca rrobba ‘u’nn‘accattati!

S’è d'uorjiu :‘u’nne parramu!

S’è bbena: e cchì cce accosta?

S’è ssulla: o virde o tosta

Su' d’anni e ‘u’ ra pruvamu!

‘E fave, ‘e tri ccarrini,

‘U sse sa a qquantu vanu

E ddeccussì i lupini

E ddeccussì ‘u nnianu

Lijiti i bullittini

E ppue, patrù, parramu!

-Ma guarda ‘sti sumari

 Quante ciutìe sapiti!

‘U sai ca me pariti

Scrivani de nutari?

Sta bbene! ‘Un te cummene?

E ttu ppecchì cce stai?

A fforza nu’ru sai

Ca nulla ti cce tene?

— Mo, chistu, è ‘nn‘àutru fattu...

— Ed è ‘nnu nuovu pattu!

-E ss’iu nu’ mmi cce adattu?

- Te mannu mo ‘u spirattu —

-            

‘A ciuccia, ppe' ra stizza

Chi le saglìudi ‘n canna,

 Vulia rrumpire ‘a vriglia e ra capizza

Ppe' lle dare dui càuci a cchira bbanna.

Ma pue guardàu bbicìna ‘a pullitrella

‘Nu mise arrieti ammaleppena nata

 E ddise: - Cchi lle dugnu’ sta virnata

Si nu’ ffatigu cchiù a ‘ssa figliulella?

‘A meglia cosa è ppemmu me cuntìentu

Senza nisciuna stupita prutesta

De ‘ss'uttantuottu misaru ppe’ ccientu

Chi, buntà ssua, me resta... –

E ccu ‘nna rivirenza

Disse:— Patrù, faciti

Cumu vussugnurìa miegliu criditi...

(E ra manu de Ddiu ppemmu cce penza!). -