Contatti

sabato 22 gennaio 2011

‘E corne e ri dinari

    


   De quannu a ‘ssu scaràzzu  cc’è ttrasutu
‘Nu jìencu niuru, vicchiaturu natu,
Massaru ‘Ntoni, ch‘era ‘nnu ‘ncamatu,
 Cumu fo’, cumu ‘u’ ffo’ s’è arricchiscìutu.

   ‘E purcìne all’urdìche hadi jittatu
E re scarpe de sola s’ha mmintutu;
‘Na gamma supra l’autra ha ‘ncavarcatu
E ffuma ‘nnu zicarru ogne mminutu.

    Iu me sugnu ccussi mmaravigliatu
Ch‘a ‘nnu cagnuolu crozzu haju diciutu:
 - Cum‘ha ffattu ‘ssu facci d’ammazzatu? —

   Cagnuolu, ch ‘è ‘nn’arùculu fujutu,
‘A vacca vastardara m’ha mmustratu
 E: — Re corne su’ dd’oru! — m’ha ddiciutu!



sabato 15 gennaio 2011

A fravetta e ru palluttinu - Il beccafico e il pallino

A fravetta e ru palluttinu


A ra cima soprana
De nu pede de ficu milinciana,
Si cc’eradi pusata na fravetta
Cchiù ggrassa de na quaglia
E ccu ru pizziciellu, ntaglia ntaglia,
Grubbava ll’utre de na ficazzana.

Nu piezzu de canaglia
Acchiappa nna scuppetta
De chille antiche a scaglia
E nna bbotta le jetta.

Cade ra fravittella
Ancora menza viva llà bbicinu
Ppecchì nnu palluttinu
L‘è rristatu mpinciutu a re vudella.

-Scilliratu! Assassinu!
Brigante! Priputente!
‘Un t’avìa ffattu nente —
Le dice ra fravetta — e mm’hai ammazzatu. -
                                
   - Ma cchi cce curpu iu? —
   Le fa ru palluttinu.
   - Te cridi ca trasutu’ a ssu stintine
  Iu ti cce sugnu ppe ppiacire miu?

‘A curpa è dde chilllu
Chi tira ru grillu! —

lunedì 10 gennaio 2011

‘A suraca e ru nnianu - il fagiolo e il grano

‘A suraca e ru nnianu


Na suraca screanzata
Intra nente era ‘ncriccata
A ‘nnu pede de nnianu
Chi criscìa mmienzu nu chjanu.

E lli s’ era
Ncatturatu ‘e na manèra,
Do’ pidale a ra bannera,
Ch‘a r’affrittu, ad ogne ggiru,
Le mancava ru rispiru.

- O surà, disse nnianu,
‘U strincìre ccussì fforte!
Ppe ppiatà, fa chjanu chjanu
Ca si nnò me manni a mmorte! –

—‘Un sa’ mmai! Ca cumu fazzu.
Nu’ bbulennu, si t’ammazzu? -
— Se capisce, ‘un te cummene...
Pue, si nnò, chine te tene?

mercoledì 15 dicembre 2010

‘U cane, ‘a gatta e ra gallina - il cane, la gatta e la gallina



‘U cane, ‘a gatta e ra gallina


A ru vagliu de Donna Catirina
Cc’è ‘nnu cane, ‘na gatta e ‘nna gallina.
  
- Quant’è bbona ‘sta patruna! —
Fà ru cane.
-Mi nne duna
Ccasu e ppane! —

- Mmece’ è mala! —
Fà ra gatta.
- Malutratta
E nnu’ rrigala! —

‘Ssu discurzu, ‘mparu sente,
Ccussì ccanta ra gallina:
-‘A buntà, ppe’ zzerta  gente,
E’ ra trippa quann‘è cchjna! —

venerdì 10 dicembre 2010

‘U sazizzaru’ e ra ciuccia -il salumiere e l'asina

‘U sazizzaru’ e ra ciuccia



‘Nu mastru sazizzaru avìa, st‘astate,
 ‘Na ciuccia tunna chi parìa ‘nna palla;
Mo’ nun cc’è mmancu vientu a cchira stalla;
Ma su ccrisciute cchiù re supprissate!

venerdì 3 dicembre 2010

Catirina e Ffidile - Caterina e Fedele

Catirina e Ffidile

                              
                              I vintidue d'aprile
                              S'èranu liticati
                              E ssupra 'nu sidile,
                              Spalli e spalli vutati,
                              Catirina e Ffidile
                              Se stavanu assittati.
                              Illu ccu 'nna bbacchetta,
                              Illa ccu 'nn 'umbrellina,
                              'Sta sorta de rizzetta
                              Scrissero ssupra a rina:
                              -L 'amure è 'nna spintura!
                              'Na pesta, 'na ruina!
                              Mmenu male ca 'u ddura!
                              Ffidile, Catirina. -

                                   Ma l'appriessu matina
                              S'èranu fatti amici
                              E ccuntienti e ffilici
                              Stritti abbrazzati,
                              Jìenu acchjappannu pullule
                              Ppe missate e ppe prati.

giovedì 25 novembre 2010

'a quaglia a ra jocca - La quaglia alla chioccia

‘A quaglia a ra jocca



‘Na quaglia, ‘na matina,
 Vidette a ‘nna missata,
 ‘Na povara gallina
Chi d’ova ‘na juccata
Cuvava a l’ammucciuni
 De cani e dde patruni.
- Mo chi m’ha’ ‘bbilittàta,
 Te priegu, ‘un me tradire. -

— Ppe’ cchine m’hai pigliata?
Sicura pûe durmire.
Anzi, si vûe aiutata
T’ajutu ccu ppiacire
Ppecchì vvòrradi avire
L’unure de scuvare
Pur’iu ‘nu paru d’ova
De chissa razza nova. –

martedì 16 novembre 2010

L’ascia e ra serra - L'ascia e la sega

L’ascia e ra serra



Mastru Santu, mastrudàscia,
Ppe’ ri fierri ha ttanta cura,
Ch ‘ogne ssira, ‘mparu scura,
‘I rricoglie intra ‘na càscia.

‘A duminica matina
‘I sdirruzza ccu binzina
 E ri mmùolica e ri ‘mpàscia
 Ccu bbammàggia e ccarta fina.
                                        

  -De nigàre — disse ll’ascia
Nu’ sse po’ ca fatigamu
Pemmu pane le dunamu;
Ma ‘ssu povaru zu’ Santu
Mieritèra autru ca tantu!

A ra fine simu stigli
E nne tratta ccumu figli:
Nne vo’ bbene
E nne mantène
Dde rignanti
A ttutti quanti.­-

domenica 7 novembre 2010

'e virghe- Le verghe


E virghe


- De quannu simu stritte a ‘nna mazzina —
dicìenu zerte virghe de castagna
Nisciunu ‘nni s’accosta mu ne mina,
Ppecchì dde nue se spagna!  —

Era bberu; ma, ‘ntantu, ‘na tignula
chi cupava ru lignu corchia corchia,
a ppuocu a ppuocu, rusicàu ra torchia
e ra mazzina se spasciàudi sula!


giovedì 28 ottobre 2010

'a licerta e ru grillu - La lucertola e il grillo


‘A licerta e ru griIlu


—‘A licerta — na pàpara dicìa
—Cchi ffà quannu camina?
Taglia ddiritta ‘a via
Ppemm‘abbicìna..

‘U grillu chi va ssempre, cumu sai,
De ccà e dde llà satannu,
Arriva a qquannu a qquannu
O ‘nud’arriva mmaì. —

-  Tu cchi mme stai a ccuntare -
Le dìssedi ‘na gatta,
-‘A via diritta è ffatta
Mmece pped’allongare! -