L’ascia e ra serra - L'ascia e la sega

L’ascia e ra serra

Mastru Santu, mastrudàscia,

Ppe’ ri fierri ha ttanta cura,

Ch ‘ogne ssira, ‘mparu scura,

‘I rricoglie intra ‘na càscia.

‘A duminica matina

‘I sdirruzza ccu binzina

 E ri mmùolica e ri ‘mpàscia

 Ccu bbammàggia e ccarta fina.

                                        

  -De nigàre — disse ll’ascia

Nu’ sse po’ ca fatigamu

Pemmu pane le dunamu;

Ma ‘ssu povaru zu’ Santu

Mieritèra autru ca tantu!

A ra fine simu stigli

E nne tratta ccumu figli:

Nne vo’ bbene

E nne mantène

Dde rignanti

A ttutti quanti.­-

  -Ccussì ra pienzi tuni —

 Disse ra serra all’àscia

— Appriessu ti nn’adduni

Chi n’è ‘ssu mastrudascia!

    T’accarizza, te vo’ bbene,

Fin’a qquannu le cummene;

Quannu no, si nne stragratta

Si ‘na serra o n’ascia scatta! -

-  Va’ ca ‘u d’è bberu nente!

‘E serre aviti tutte malu dente!

—Doppu n ‘annu, Mastru Santu,

‘A putìga ‘u’ rrapirìu

E dde pappi  ognunu tantu

Tutta quanta li s’inchju.

Chiri fierri, canti canti,

S’arruzzaru ttutti quanti.

Disse ll ’ascia: - Nummu vene,

Santu miu chi sa cchi ttene? -

E ra chjana: ‘Un tene nnente

  - Disse cchiaru a ra parente

 —Tiempu arrieti, Mastru Santu,

Ha bbinciutu ternu siccu

E ss’è ffattu ccussì rricu

Chi ‘un te sacciu dire quantu.

‘Mparu i nicheli ha ‘ntascatu

A ffa’ frijere ha mmannatu

Chiri fierri e cchire chjane

Chi quannn‘eradi ‘ncamatu

Le dunavanu lu pane...

A bbuce vàscia vascia

Disse ra serra all’ascia:

-Cummà, cchi tti nne pare?

Era ru malu  dente

Chi me facìa pparrare?... -





mastrudascia: falegname 
'mparu scura : appena fa buio
cascia : cassa


mmuolica :avvolge
pappi : ragnatele
arruzzare : arrugginire