'a quaglia a ra jocca - La quaglia alla chioccia

‘A quaglia a ra jocca

‘Na quaglia, ‘na matina,

 Vidette a ‘nna missata,

 ‘Na povara gallina

Chi d’ova ‘na juccata

Cuvava a l’ammucciuni

 De cani e dde patruni.

- Mo chi m’ha’ ‘bbilittàta,

 Te priegu, ‘un me tradire. -

— Ppe’ cchine m’hai pigliata?

Sicura pûe durmire.

Anzi, si vûe aiutata

T’ajutu ccu ppiacire

Ppecchì vvòrradi avire

L’unure de scuvare

Pur’iu ‘nu paru d’ova

De chissa razza nova. –

  -Ma tu... Te pûe fidare

 Pûe essere sicura. -

- Nu’ mme tradisci? E Jjura... -

Juru! — Ristàu. Cuvàu;

Ma ‘na matina, quannu

Se stavanu scuvannu

Tutt’a ‘nna bbotta l’ova

De chira razza nova,

‘A quaglia se squagliau...

Ed eccu ca demane,

Cumu si già sapìa

Ru numaru e ra vìa,

Se prisintau ‘nnu cane:

‘A jocca se ‘mmuccàu

e ll’ova scamacchiàu.

Cchi rrazza de canaglia

Chi foze cchira quaglia!

Glossario:

a l'ammucciuni : di nascosto