A ficu scarrica
Intra ‘nu petrarizzu, a ‘nna manchìa,
Cc’era ‘nna ficu uttata
Chi ‘na cimuzza tanta spampinata
E‘nnu truncune fracitu tinìa.
Era ‘ncrustata de piducchiarola
Ennud’avìa ‘nna sula scattignola.
Passannu, stamatina,
De llà Mastru Nicola,
A cchira spinturata s’abbicina
E re dice, mmarcannu ogne pparola:
- Ma ccà cce vo ‘‘nna furca,
Si nnò d”o troppu pisu
Me spagnu ca ‘ssa ficu mi se curca!
Ah, ‘nu sustiegnu cce vo’ ppropriu misu!
Guardàti cum ‘è ccarica!
Me pare ‘nna murtilla!
Si mina ‘nn’ugna vientu cc’è ppiriculu
Mu cade e lli se rumpe ra cudilla!
Aguannu ccu ri frutti
Chi me raghi, m ‘abbutti!
- Si ‘u’ ffazzu ficazzane -
Disse ra ficu - ‘A curpa ‘ud’è ra mia;
Ma sulamente de vussignurìa
Chi senza nullu ajutu m’hai lassata
Criscere a ‘sta manchia...
Si m’avere chiantata
A ‘nnu diestru, sùtt‘acqua e ‘mpumirata,
Pur’iu t’avera ddatu de sciaverte
‘Nu paru de cuverte quantu vele;
De chille chi a re vucche menze aperte
tìenu ccumu ‘na lacrima de mele! –
Nicola, a ‘ssa scola,
Pirdìu ra parola!
