‘U sirpente e ru trenu

‘U sirpente e ru trenu

  ‘Nu cagnu de sirpente,

Malignu e ppriputente,

S’era mmintutu ‘m mente

Ch’illu sulu cuntava e ll’autri nente.

     E qquasi ch‘ognentura

‘Mpastidiscia ra gente

Diciennu:- ‘un c’è ssirpente

Ch ‘a mmie me fa ppagura!

Iu fazzu,

A ‘nnu pitazzu,

Gnurnare quannu scura  –

  ‘Nu juornu, ‘ssu ‘nzìnzatu,  

Se mise dde travierzu stinnicchiatu

Intra ‘na galliria

Pped’ammarrare ‘a via,

Nentemenu, a nu trenu.

Ccu‘nna linterna ‘m manu

Vinne ‘nnu guardianu

E re disse, ccu ddebbitu rispettu:

- A mmie, gnornò: ma, armenu

Fà passare ‘ssu trenu

Ch‘è ddirettu.

- De ccà nun passa nnullu,

Nnè cchiù ttardu nnè mmò:

E ccitu !  cà si nnò,

Llà tte zimmullu!  

Intra ‘stu mentre, birr! de tutta corza

Vinne ru trenu e ssenza dire: oi!

‘U ficedi a ttri mmorza!

Cc’è ssempre d”u sirpente

unu cchiù ppriputente.



Glossario: 
mintutu: messo
ognenturra: ogni momento
pagura: paura
a nu pitazzu : in un momento
gnornare: albeggiare
scurare: fare buio
'nzìnzatu : insensato

stinnicchiatu:  lungo disteso 

ammarrare: bloccare 

morza :pezzi