Ricumpenza

Ricumpenza

     Doppu vint’anni e cchiù dde guardianìa

Fatta daveru cumu Ddiu ccummanna,

‘Na cane, catananna,

Èradi alI’agunìa.

   Cà mentre difinnìa, ra notte avanti,

‘Na piecurella janca,

‘U lupu - arrasu sia dde tutti quanti! -

Le dèzedi de vranca

E, ccu‘nnu muzicune,

Le muzzàu ra cannella d”o purmune.

‘U cumpari patrune

Ppecchì sse ricordava

Ca chira spinturata,

Quann‘era bbirde e ssana,

‘A mandra ccud’amure avìa gguardata

E re galline e ll’uva marcigliana,

Vidìennula a ‘nnu cantu

Murire abbannunata,

Doppu ch’avìa pped’illu fattu tantu,

Se ‘ntise dde dulure ‘na vunnata

E re scappàu ru chjantu.

 E ccidìennu a ‘nna vuce

Chi le parrava dduce

De carità, d’amure e dde cuscienza

Ppe’ ‘ssa povara cruce,

Chiamàu ‘nnu gilunaru

E ra fice, mmivienza,

Jittare a ru stringaru.