Vidute

    Viju  de frunte a mmie pped’ogne bbanna

 Muntagne e ppue muntagne

 Ammantate de cerze e dde castagne

 Càrriche de giurranna.

Dduve cc’è ‘ncunu chjanu

‘A terra unnija, simminata a ggranu

 E, tra tuttu ‘ssu virde, a ddestra e a mmanca,

Ammucciata, se vide

‘Ncuna casella janca

Chi spija ‘ntuornu e ppàrica  surride.

   ‘Na trempa pinninuta

 Luntana e scavunata,

 E’ ttutta scacchijata

De jinostra juruta.

   L‘urtimi munti, chilli

Cchiù bbicini a ri stilli,

Su’ ttutti quanti chjni

De carigli e dde pini.

‘U cielu è ttuttu luce

E ll’ecu, ccu ‘nna vuce

Appassiunata e dduce

  Ripete ssempre e ssempre

Ppe’ ttutte chire trempe

Gridi de quatrarielli

E bbiscuni d’aggielli.


Glossario: 


banna: parte
cerza: quercia
jinostra:ginestra 
juruta: fiorita

chjanu: piano
trempe: dirupi

quatrarielli:ragazzini
bbiscuni: fischi