A mussarola - La museruola

‘A mussarola

‘Nu patrune sprigugnatu,

A ‘nnu cane spinturatu,

 Appricau ra mussarola,

 Mu le strunca ra parola.

L ‘àutra notte, ‘na fuìna,

Le scannàudi ‘na gallina.

-Cumu va — disse ru ‘mpisu  —

Ca ‘u’ mm’hai datu nullu abbisu? —

E ru cane spinturatu:

— Va cà tu m’ha’ ‘mmavagliatu! —

 

‘A jumenta e ra pullitra

‘Na pullistrella ccu ‘nna stilla ‘mprunte

Arrija apprìessu appriessu a ‘nna jumenta.

Ha ru core de zuccaru, è ccuntenta

E llisciu e cchianu le pare ogne mmunte!

‘A mamma chi de ligna carricata

Assacca a ‘nna ‘nchjanata

Ed è ccussì ssudata

Chi guala guala fuma,

Cumu si mmuolicata

Fora a ‘una neglia ‘e scuma,

Fa ‘na capuzzijata

E re dice: te ‘nganni,

Povara pullitrella;

‘Sta vita chi te pare ttantu bbella

E’ cchjna de pirogati e dd’affanni!

Vulisse ppropiu Ddiu

Ppe mmu me spagliu iu!

     Ma tra ‘nu paru d’anni

Quannu ‘stu durzu ‘ncigna

A carrijare ligna

Cumu stu durzu miu, ,

Tannu mi nn‘addimanni!