Contatti

martedì 31 marzo 2015

'A duminica d'e Parme

 'E Parme su' passate e mme dispiace
Ppecchì nun mm'è rrisciutu,
Cum'avera bbulutu,
Cu ra quatrara mia de fare pace.
  'Nu garamu d'aliva benedittu
Iu cce l'avia mmannatu,
Ma nun se l'ha ppigliatu
Cà 'u' mme vo' bbene cchiù: ccussì m'ha ddittu.
   Vide cchi  mmala sorte! E mmo' cchi ffazzu?
Me scannu? Mi nne partu?
Me palìju? Me squartu?
O me 'mpicu? a ri travi ccu 'nnu lazzu?
   - Gnornònzignore? E' mmieggliu ccu' cchiù ddota
Mu n'autra ti nne truavi
Prima de 'ss'àutru juavi...
Vo' dire ca  t'ammazzi n'àutra vota!-

giovedì 26 marzo 2015

'Na vota 'Ntoni

'Na vota 'Ntoni quann'era mmarinaru
Ccu 'nna carta de mille
S'appiccicava 'a pippa.
Ma moni, s'è fattu ccussì avaru
 Ca ppe' n'unza e menza de fragaglierìa
Aspettadi mu vascianu l'assisi.

martedì 3 marzo 2015

Jiennu a ligna

    Ppe' ra via d'i Lupirtielli
Rusinella a lligna va.
A ra banna ha ddui fratielli
Unu cca e ll'àutru llà.