Essere e pparire

      Na facci d'ammazzata
De ciuccia scuontricata
Rumpiu nu capizzune
E se 'mpilàu 'nna pella de liùne.
     Deccussì stracanciata
Va vide chine pesta se cridìa.
E ppe' chissu, de l'arva a ra scurata,
A cchi scaccava e a chine purmintia.
    Ma 'na porca grattata
De vurpe, chi sinn'eradi addunata,
'Nu juornu, citu citu,
S'abbicinau e re disse; - Maistà,


      Pàrica te canusciu...
A su piduzzu musciu
Tu me pari 'na ciuccia de trappitu.
      Cce sugnu viramente, ma, cummari,
Nu' ddire a nullu nente
Si nno, povari affari!
      Ppe chissu, pue dormire sprecurata; -
Ma, dicime na cosa: 
Addimmannau Zarosa
    -Tantu t'aggiuva pue sta mascarata?
'ud' è ru mantu
Chi fa ru Santu;
Si' troppu arrieti, amica,
Chissa è murale antica.
Moni si vue gudire; hai sulu de parire.


   10 febbraio 1922

Ddon Grabbiè...

Ddon Grabbiè, manciative 'st'aglire
- Sugnu prievite, è bbennari e nnun puozzu-
-  Pruvatilu. Cchi ffa? - Làssame stare - 
E 'mmacante nnucìu ru cannaruozzu.
     -Facitime st'unure: n'anchicella..
Pruvàtila. Cchi ffa?- -Nente..è ppiccatu! -
- Mancu si ve manceravu 'na fella
De logna o 'nu cusciùne abbuttunatu!