Tantu cchiù. Al Comm. Michele***

S'ogne bota te sciegli mu me chiami
I juòrni chi 'un ce sugnu
Sempre de cchiù m'addùgnu,
Miché, ca cchiù nun m'ami.
Iu no.  Quantu cchiù  amare su' re pene
Tantu cchiù, Ddo' Mmichè, te vuogliu bene!

Zampugne scordate. Al Comm. ***.1939

  Cch'è successu? Te mannu a 'nna simana,
Mo na littera e mo 'na cartolina,
E ttu, fattu cchiù surdu e na campana,
te buzzari de Peppe e dde Rusina.
Ma ccu due vierzi e mmo ccu 'nna quartina,
a vuce mia fin'a 'ssu Roma 'nchiana;
ma tuni, pecchì è rustica e pacchiana
  'A tratti cumu l'urtima mappina.
'U sacciu: na zampugna paisana
Chi cchiù nud'ha ru suonu e l'ocarina
Ha d'essere mintuta 'nquarantana.
        ma nu' me pare giustu, pardiana
Ca mentre 'u core  miu ti s'abbicina
'u tue de sta manera s'alluntana!

Visite. 1931. A Don Michele Inzillo e a Nino Servello.

 'Nu juornu capitai a Monteleone
E cumu 'nu babbu
Currivi a ru Liceu
ppe salutare due pirzune.
   - Cchi buliti?-
Me disse ru bidellu.
-Cc'è Ddo ' Michele Inzillu?
Cce sta Ninnu Servillu?

Punto fermo. Al Comm***. 1937

Caro Commendatore (prego Eccellenza!)
Perché giunto a Palermo
Hai messo un punto fermo
Nella corrispondenza?

Parole, parole, parole... Al prof***. 1950

      Te ricuordi, Pippì, cchi mme dicisti
'Na sira a ru "Modernu" o te scordasti?
De propria  vuluntà me purmintisti
Ca parrave a Mannella...Ce parrasti?

         Zorbe! Pecchì dulente me vidisti,
'Na speranza a ru core me 'mpilasti...
Ma pue...Bella parola chi tinisti!
De mie nun ti nne mancu 'ncaricasti!

       Chira sira, 'na manu me prujisti,
'A capu de primise me l'ujjasti
Scaruzzi... Craparizzi.. Cchi bbidisti?
 

    Ma 'mparu a Catanzaru ti nne jisti
A me strabbenedire me mannasti.
Pippì, cchi malu core chi tinisti.

Pirmissi. All'Avv. Ventura. 1917

Mintimu ch'a Mancini
Pirmissi  'u' re dunera.
L'amicu Fidiricu
De mie cchi nne  dicera?
 Dicera ( e ce mintera
'Sta capu ppe' scummissa)
Quantu s'è fattu fissa
'Stu cacchiu de Butera!
Cumu ca fissa 'u' sugnu,
'U' pirmissu le dugnu.

Bomminitu. Al poeta Giuseppe***

  Moni chi a Ccatanzaru si' tornatu,
Te riennu Ddon Pippì, chiru salutu
Chi de Fiuggi -Fonte m'hai mannatu
E te dugnu de core ' bomminutu.