All'Avv. Luciano Cerminara. Nicastro

         4)  ' Na vota me dicisti: - Amicu caru,
Si chista banca nostra se pigliera
Ru tassu chi se piglia
A Catanzaru,
Parola mia, ca mi nne vrigugnera! -
E mmo,  Ddon Lucià, cchi tinne pare?
De chillu, ch'hai  'ncignatu a me pigliare?

                                                     3-3-'39

Concorso

All'Avv. Luciano Cerminara

      3) Te vuogliu tantu bene,
Te stimu 'un se sa qquantu,
Te viju intra 'sse pene
E mi nn'affriggiu tantu!

All'Avv. Luciano Cerninara. Nicastro

     2) Fina chi Ddon Franciscu Carvaranu
Acchiappa 'nna scuppetta
E ccumu 'nnu brigante, armatu manu,
'Na pallata me jetta,
Sacciu ca Ddon Franciscu è 'nnu cumpagnu
De Passannante e mmancu mi nne lagnu.

All'Avv. Luciano Cerminara . Nicastro

 1. 'Na vota 'nu tirannu
Chiamatu Ferdinandu
Amminazzau ru populu 'mpilice
(' A storia ccussì ddice)
De mintere a ru codice pinale
'A pena, chi già cc'era, capitale!

Spàrtere gualu

  E' maju e re visciòle
Scimmòllanu  a mazzina,
Paru tante ricchina

De curallu a ru sule.
    Franciscu ccu' nna scala
De quindici piruni,
'Na cima, guala guala,
Nn'ha cuotu a ri patruni.
    Ppe d'illu si nn'ha, ppue,
Se sa, cugliutu due,
E ppe' ru gilunaru,
Chissu è spartire gualu.

                                         11 gennaio 1927