Iu de parola, t'assicuru 'u' mancu,
Ma Luice De Francu,
Si dice nniuru è jjancu.
Si dice 'mpannu, è 'mpunnu
Si dice qquatru, è ttunnu.
Si dice ssupra, è ssutta
Si dice bbella è brutta.
Si dice mmoni è ddoppu
Si dice ppuocu è troppu.
Si dice vaiu, vene
Si dice mmale è bbene.
30 dicembre 1932
Donna Flò, t'avia ccircatu,
Ppe' 'sta Pasqua, 'nu martinu;
Cumu va chi m'hai mannatu
Chista rota de mulinu?
' Na cuzzupa ccu ccinqu'ova
Sai cchi prova?
Ca si' ttroppu ginirusa
E nnun s'usa.
Iu te mannu 'na juccata
D'ova niure ' cicculata.
Cara cummari, è primavera. Vene
De luntanu n'adduru de viole.
Iu me sientu'na cosa intra 'ste vene.
Chi nun t''o sacciu dire ccu parole.
S'ogne bbota te sciegli mu me chiami
I juorni chi 'un ce sugnu,
Sempre de cchiù m'addugnu
Miché ca cchiù nu' mm'ami.
Iu no. Quntu cchiù amare su' re pene
Tantu cchiù, Ddo' Mmiché, ti vuogliu bene.
!5 marzo 1933
............................................
Chillu chi nun po' ffare
'U dirittu romanu,
'U fa caru avvucatuAh, cchi munnu sciliratu!
e cchi bbita 'nciuotisciuta!
Mmenu male ca 'nne datu
De nne fare 'na futtuta!
Zerti juorni, mi nne fazzu
Cchiù ca puozzu... Nove, dece...
E ssi forra tuttu cazzu
Sterra sempre intra 'nu cece!
A bbint'anni vastàvadi 'nu jure
Ppe fare ccu 'nna fimmina a r'amure;
A ccinquanta cce vodi 'na catasta
De biglietti de banca e mmancu vasta!
9 gennaio 1928
'Na maruzza sagliuta chianu chianu
Supra n'arcu rumanu,
guardau ra strada fatta
E ddisse a ra licerta de 'na tana:
- Supra sta terra nostra taliana
'Un c'è chine m'appatta;
Si n'autru pocu 'nchianu,
Nne vidi vattimanu
E nne vidi alalà.
- Se capisce! Se sa!-
Le disse ra licerta.
- Si' ttantu granne tantu lesta e sperta
Chi 'ss'unure te tocca bbiramente;
Ma cchiù pprinciparmente
Ppe' ra vava lucente
chi lassi
Dduve passi!
30 settembre 1935
- Cumpari 'Ntò, chiamative 'ssu cane
Si nno le sparu 'mprunte 'na pallata!
- Pristi ccà. Pristi ccà. grann'ammazzata
Si vue ristare ccu re gamme sane.
Pecchì, mmo tutti quanti
'Ssi munni sunu chini
De latri e de briganti
De puorci e dd'assassini?
- Ppecchì? Ppecchì s'è bberu ca nascimu
I mienzi bbuoni e ll'autri mienzi mali,
Mentre i mali ristamu tali e quali
i bbuoni cchiù briganti nne facimu.
17 ottobre 1939
Al Comm. Michele Galatà
Cch'è ssucciessu? Te mannu ogne ssimana
Mo 'na littira e mmo' na cartulina,
E ttu, fattu cchiù ssurdu 'e 'na campana,
Te bbuzzari de Peppe e de Rusina!
Mo ccu ddui vierzi e mo ccu 'nna quartina,
'A musa mia fin'a ssu Ruma 'nchiana;
Ma tu, pecchì è bbistuta de pacchiana,
'A tratti cumu l'urtima mappina!
Capisciu: 'na zampugna paisana
Ppecchì nnud'ha ru suonu 'e l'ocarina,
Ha d'essere mintuta 'n quarantana.
Ma nu' me pare giustu, pardiana,
Mu mentre 'u core miu ti s'abbicina,
'U tue de 'ssa manèra s'alluntana.
21 settembre 1939
Dissedi 'nu cantante a 'nu manciune
- Nnammazzadi de cchiù
'Nu cannaruozzu ca nu sciabulune.
- Sicuru, nn'hai ragiune.
E 'mpatti quannu canti
Ammazzi ttutti quanti !-
22 ottobre 1926
A ra sanguetta disse 'nnu malatu:
- Te vuogliu tantu bene
Chi 'u sangu de 'ste vene
Te dugnu rigalatu.
È bberu. Si' 'nn'amicu affizziunatu-
Rispunniu ra sanguetta 'e 'nu pantanu,
- Ma iu vulera cchiù ssangu de sanu
ca sangu de malatu!
17 ottobre 1939
- Cicà, vorra ssapire pecchì ttu,
Chi m'ha' fattu 'st'astate.
Tutte chire cantate,
Moni nun canti cchiù-
Nulla risposta. 'Na furmica astuta
Chi saglia muru muru,
Disse: 'U' lu sai ch'ogne cicala ammuta
A re prim'acque de castagnaturu?
A mia nipote Sara
Che tante lingue impara,
Questo modesto saggio
Di canti conflentari
offro perché del pari
il nobile linguaggio
Della mia terra impari.
2 gennaio 1947
È ru suvaru 'nu tappu
Chi me serve pp'ammullare
Quanti grubbi apierti 'ncappu
Dduve e quannu cchiù me pare.
Signorzì; ma l'arte, pensa,
Ca vo' usata ccu prudenza'
Cà si 'mpili a'ncunu cuollu
dilicatu de buttiglia,
Po' succedere 'nu 'mbruogliu
Chi sbrigogna 'nna famiglia.
6 maggio 1922
