A ra musa

A ra musa

Povera Musa mia mmicchiarrunata,
Stìpate l’arpa e ra jacchèra astuta.
Me spagnu ca ‘sta vota èdi vinuta
Ppe’ ra canzuna l’urtima jurnata.

‘Na vota, a ra cchiù ppicciula chiamata,
Lesta ti nne vinìe ccu ‘nna curruta;
Mo riesti ‘n terra, mazzupita e mmuta
E de vulare ti nne si’ scurdata.

Ma ppecchì, ma ppecchì m’ha’ ‘bbannunatu?
E ppinzare ch ‘avèradi vulutu
De tie fin ‘a ra morte accumpagnatu!

Ah, quantu, quantu avèradi gudutu
Si, ccu ‘nn’ùrtima rima, sìggillatu
‘U cuvìerchiu m’àvere a ru tavutu!

Glossario:

mmicchiarrunata: invecchiata
Me spagnu: ho paura
curruta : corsa
mazzupita : infiacchita
tavutu : bara