Cchid’è ra legge

Legge:‘na rite a llastica

Dduve si ‘ncunu ‘ncappa,

Cce resta s’è ffurmicula

E ss’è bbitìellu scappa!

A gnuranza u’ mmore

A gnuranza u’ mmore

‘Nu cavallu dicìa: — De quannu ‘nterra

De nimali cce su’ rrazze criate,

Simu tutte a sparire distinate

Cà ‘u tiempu, ura pped’ura, nne fa gguerra.

Migliara d’anni arrieti, ppe’ ‘sti prati

Caminavanu sauri ed ammuniti;

Ma mo, de tutti quanti ss’antinati,

Sulu ‘ncun‘uossu a ri musei viditi.

Cumu pirìu ru mammuttu, viatu,

Ccussì ppère ru cane e ru sciacallu;

Ccussì ppère ra crapa e ru crastatu

Ccussì ppère ru mulu e ru cavallu! —

‘Nu ciucciu ‘e chissi niuri, cu ttri rragli

Disse: — Cavà, te spagli.

Ppe’ ri cientu mutivi chi tu sai

‘A razza mia nun pò mmurire mai! —