‘U mulinaru e ra ciuccia

Tirannu ppe’ capizza a ‘nnu pinninu

‘Na ciucciarella càrrica de granu,

Ciccu si nne turnava, cchianu chianu,

Mmierzu vintiquattr’ure a ru mulinu.

Quann ‘èccute vinire de luntanu

A strarutta de cuollu ‘nu trajinu,

Cà ‘nu mulu vizzarru cavallinu

A ru patrune avìa ppigliatu ‘a manu.

‘U Ciccu, primurusu de sarvare

Non tantu ‘a sua quantu a ra ciuccia a vita,

Mparte mu ccu ‘nnu sàutu se gavìta

E mmu lassa cchill’autra buzzarare,

Se mise a ttutta forza a ra tirare

Dduve cchiù llargulilla era ra strata;

Ma chilla ristàu ‘nterra ‘mpirunata

E nnu’ sse voze ‘nn‘àcinu arrassare.

— Arri! — gridava Cciccu. — Arri, ammazzata,

Cà vene ru trajinu e nne summuzza!

Ma chira capitosta scuontricata

Cchiù Cciccu tira, cchiù ru trugliu appuzza!

Vistu ca nun ce resce, arrieti vota

Ru Ciccu ppe’ lle dare ‘na mmuttata;

M’arriva ru trajinu e tte l’arrota...

‘A ciuccia nu’ ffo’ mmancu muoticata.

Avanti a ru piriculu hai de fare

Cumu ‘ssa ciuccia, si te vue sarvare!