12 Ottobre 1929 (all’Avv. Riccardo Folino)

Chi sa si Ddo Rriccardu s’è spusatu?
U luni ‘u’ ss’era ancora dicidutu;
Ma disse ch ‘a ra porta ‘e nu curatu
Avera ppe ru sabbatu vattutu.

Capisciu ch ‘è nnu passu dispiratu
E cce vo’ ccientu vote rifrittutu;
Ma unu chi tant’anni cce ha ppinzatu
‘U sse dicide alI’urtimu minutu.

Ed eccute ca sabbatu è bbinutu
E nnullu sa si ancore l’Avvucatu
A cchira porta cce hadi o no vattutu.

Iu dicu deccussì: si s’è spusatu
Mu fa ccinquanta masculi a mminutu;
Si nnò va ppe’ d’aguriu anticipatu.

Cuncurrenza

Vidiennu a ‘nna dispensa
 ‘Na suriciara armata,
  -‘Sta machina me fa cuncurrenza! —
Disse ‘nna gatta, ann‘angulu appustata!

Capituosti

—Si nu’ ra pienzi ccu ra capu mia
 ‘A missa me custrinci a tte cacciare —
Bbonsignure a ‘nnu paracu dicia.   
- Cacciame tuttu chillu chi te pare! —
‘U malu capitatu rispunnìa, —
Ma ccu ra capu mia famme pinzare!

Pinne mastre

Cugnume e nnume, Pane ddo’ Mmichele

 Te dìcenu chin‘è ‘ssu cristianu:

‘Nu bbuonu, cum’è bbuonu ‘u pane ‘e granu;

 ‘Nu giustu, cum’è giustu Sammichele.

S’è bberu ca ‘nu juornu azàu re vele

Ppe’ ssi nne jire ‘e nue tantu luntanu,

Ligatu a ffilu duppiu a ru nustranu

Lassau ru core chi ‘un canusce ffele.

I cientu canti dduve ha mmisu manu,

Pàrenu scritti ccu ru miegliu mele

De tutti quanti i juri de Rumanu.

Vòlanu ‘n cielu, suli, senza vele,

Te trasenu a ru core chianu chianu.

Ah, ss’avèra ra pinna ‘e Ddo’ Mmichele!

Nuvembre

E’ nnuvembre e ru vìentu                                   

‘E pàmpine de l’àrvuli

Spirnuzza  a ccientu a ccientu.

‘Na pòvara castagna

Culinuda ristata

Dice mmurtificata

A ‘nna cumpagna:

—Madonna, cchi bbrigogna!

Ca cumu cumparimu

Spugliate cumu simu?

Mìegliu ppe mm‘a carvune

Nne facìa ru patrune! —

‘Na fimmina sintiennu ssu languru

Disse: viditi vue, puru se lagna!

Putìa, mmannaia ppuru.

Nàscere iu castagna!

Duce 1922

 

‘Ccu ‘nna mmerda de vue

Dui quatrarielli

Facìenu priscarielli.

— Fitusi, cchi ffaciti? —Disse ru patre

‘Mparu I’appe bbisti.

-

-Oh pà, nu ru viditi,

Stamu faciennu

Prìscari fascisti! —.

— E ru Duce, dduv’è? —

— Nu’ ru facimu,

Ca cce vò troppu mmerda

E... nnunn’avimu! —               
                                                                                  Video di Saverio Stranges
                                 

Risuglia

‘Na scrufa Iibbirata a ra risuglia

 Disse a ‘nna cerza: — Cerza mia, si ‘ggranne-

Dici daveru o parri ppe’ re glianne

Chi t’hanu fatta fare truglia truglia? —

Liticanti, attienti!

 

‘Na vota, Ddon Lliune e Ffirdinannu,

Ppe ‘nna cosa de nente, se mbrigaru;

’ Avanti a ra giustizzia se citaru

 E ra lite duràu ffin ‘all’atr’annu.

Unu vinciennu e ll’autru cchiù appillannu,

Marturanu, Nicastru, Catanzaru,

A ra Gran Curte ‘e Napuli arrivaru,

Pirìti ed avvucati cunsurtannu.

Llà Ddon Lliune vinse, ca ‘u liune,

Puru ch‘ha ttuortu, mintetilu ‘n mente,

All’urtimu finisce ch‘ha rragiune.

Ma cchi ccunchiuse? ‘E riccu a ri Cujjienti

Turnàu ccu ra cammisa sulamente...

Chill’autru, pìeju! Liticanti, attienti!

'A ru puostu

—‘Stu saccu de chin’è? Nullu rispunne?

—È ru miu, capùrà — De cchid’è cchjnu?

—Cc’è ‘nnu puocu de... granu saracinu.

‘U ru munciunijare  cà  se sciunne!

—Se sciunne?... Haju capitu! Cc’è ru ‘mbruogliu...

Vieni ccu mmie a ru puostu cà vidimu.

Sintiti... ‘a virità... Cc’è ‘nn ‘ugna d’uogliu.

Ppecchì, dde bbuoni amici, ‘u’ nn’o spartimu? —

—Cumu hai dittu? Ppe’ cchine m’hai pigliatu?

Marcia a ru puostu! Posa ‘u saccu! Fila!

Cchi tte cridìe? Ca sugnu ‘nu spurcatu

Cumu vussugnuria, d’a stessa tila?

A mmie dici spartimu? Farabuttu!

A mmie chi sugnu ‘u jure e l’unistà.

Ad unu chi rinunzia a ra mità... —

—Ppe’ sse pigliare, unestamente, tuttu! —

'A purga

   - Spizzià!  -Cchi tt'accurre? -'E stamatina
Tiegnu a ra panza 'a rivoluzione.
Pàrica, senza nulla cumpassione,
'Nu sirpente me grubba re stintina!

   Haju ccà d 'intra cumu 'na virrina...
Cchi ppo’  dd'essere mai? -'Na 'ndigistione.
-E nnun ce sta nnisciuna midicina ? -
-Ca cumu no? 'Na purga 'e chille bbone! –

E mme prujìu d’intra 'na cagna 'e busta
'Nu puocu de citratu ccu 'nnu mienzu
Cucchiaru de crimure. -Quantu custa ?

-            

- Cinquanta lire! -A 'ssa pardiu 'e trunata
Me vinne llà ppe' llà tale discienzu
Chi me fice dde purga rigalata! -