'A ru puostu

—‘Stu saccu de chin’è? Nullu rispunne?

—È ru miu, capùrà — De cchid’è cchjnu?

—Cc’è ‘nnu puocu de... granu saracinu.

‘U ru munciunijare  cà  se sciunne!

—Se sciunne?... Haju capitu! Cc’è ru ‘mbruogliu...

Vieni ccu mmie a ru puostu cà vidimu.

Sintiti... ‘a virità... Cc’è ‘nn ‘ugna d’uogliu.

Ppecchì, dde bbuoni amici, ‘u’ nn’o spartimu? —

—Cumu hai dittu? Ppe’ cchine m’hai pigliatu?

Marcia a ru puostu! Posa ‘u saccu! Fila!

Cchi tte cridìe? Ca sugnu ‘nu spurcatu

Cumu vussugnuria, d’a stessa tila?

A mmie dici spartimu? Farabuttu!

A mmie chi sugnu ‘u jure e l’unistà.

Ad unu chi rinunzia a ra mità... —

—Ppe’ sse pigliare, unestamente, tuttu! —