A prìedula

   Nn'avìa chira bon'anima
De zu Giuànni Carinu 
A chira crozza 'e tumminu
Mente e cciarviellu finu! 

Dente per dente (serenata d'addio)

   Tu me dici ca Ddiu
Spirannu 'ncruce a Jiuda ha ppirdunatu;
Si fora statu iu
L'avèradi scannatu.

L'addiu

  'U juornu chi ppe' nnue se priparava
D'u distaccu tirannu e scilliratu,
'N'urtimu appuntamentu m'avìa ddatu,
Avanti mu ppe' sempre me lassava.

Sirinate

   Chiovedi chianu chianu ed iu de n'ura
Te staju ad aspittare.
Spalànca, bella, 'sta finestra scura
E làssate adurare.

I viènti

Erad'autu  ccussì. Ccu 'nna zanella
chi fin'a re jinocchia me pinnìa 
china de  livri e dde 'ncuna rusella
Faciadi a scusic'a ra scola jìa.
E Mmmastru Manuele me minava
Ppecchì 'a lezzione  'u mme 'mparava.

Concorso regionale

Premio "Vittorio Butera" -8 novembre Martirano Lombardo

Rivintinu

    De luntanu o de vicinu
Si te viju , o Rivintinu,
Iu me sientu intra 'stu core
Tuppi tuppi  'u vatticore.
- Ma pecchì ? .
- Eh, cca sì! -
   O ch'è biernu e ttu janchiji
O ch'è estate e ttu virdiji
Si te viju me ricriju
E mme sientu intra 'stu core 
Ttuppi tuppi 'u vatticore-
-Ma pecchì ? -
- Eh, cca sì! -
  Quannu mina ru ponente 
E sconquassa cumu nente
'e curine de 'nu pinu
Tannu iu sientu intra stu core
Ttuppi tuppi u vatticore-
-Ma pecchì ? .
- Eh, cca sì! -

L'orfanu

 Iu sugnu tal'e e quale a 'nnu cicatu
chi mai 'nud'ha ra luce canusciutu.
Si 'ncunu le ricorda chi ha ppirdutu
'U bene chi 'un podd'essere appattatu,
'Na lacrima de chiantu dispiratu
Le scinne llenta de chill'uacchiu mutu.

'u suttamanu

'Ntoni De Piru e  Carmine Varrile
avienu, ppe' zert'acqua 'e nu canale,
Nu judizziu civile
Avanti 'u  tribunale.
Ma, ppe' ru dire cume Salumune,
'Ntoni avia ttuortu e Carmine ragiune.
                Contrariamente a quantu capitare
Sòledi sempre, 'u povaru avvucatu
Avìa chiaru parràtu:
- o 'Nto', cce viju scuru.
Vide 'e t'aggiustare
Cà pierdi de sicuru.-
       - A ttie ccussì te pare?
E quantu cce mintìmu
Ca l'atture, sta vota, è cunnannatu?
Chillu chi  nun po' ffare
'U dirittu romanu,
'U fa caru avvucatu
Nu buonu suttamanu.
   E, cumu mpatti, a quantu m'hau ddiciutu,
'Ntoni Roperti dicica ha binciutu.