A prìedula

   Nn'avìa chira bon'anima
De zu Giuànni Carinu 
A chira crozza 'e tumminu
Mente e cciarviellu finu! 


   Ccu ttuttu chissu, sciùnnère
De filu 'ud'arrivau
'Nnu 'ncatturatu gliommaru
E si cce scirvillau.
    Pecchì  -ddicìa - 'sta priedula 
Tri gamme sule cc'ha?
Pecchì ccu ddue s'arrùozzula?
Ppecchì ccu d'una  'u' sta? 
    Pecchì? Qual è ra magica
Ragiune? Pecchì mmai
Unu o dui piedi 'un bastanu
E quattru sunu assai?
  Chine te fice, o prìedula,
Nne capiscia chi mancu:
N'anca de cchiù a 'un ce mintere
N'anca de menu mancu. 
   O mente umana, diceme
'Na vota armenu tu.
Ppecchì tri gamme vastanu
E quattru su' de cchiù ?
  Fatiga persa! Sciùnnere
Nnu' sseppe 'ssu filatu
E ccu'  'ssu piernu all'anima
'Ncielu si nn'è nchianatu.
  Foze  'nna mente mascula,
Avia ra capu fina;
De scienza cupa carrica
E dde silenzia china.
   Ma nun sapìa ca l'uomini
Murimu tutti quanti
Ccu ccientu pierni simili
'Nchiuvati arrieti e avanti.
                                  Conflenti, 4 dicembre 1904
  
.