Ddon Grabbiè...

Ddon Grabbiè, manciative 'st'aglire
- Sugnu prievite, è bbennari e nnun puozzu-
-  Pruvatilu. Cchi ffa? - Làssame stare - 
E 'mmacante nnucìu ru cannaruozzu.
     -Facitime st'unure: n'anchicella..
Pruvàtila. Cchi ffa?- -Nente..è ppiccatu! -
- Mancu si ve manceravu 'na fella
De logna o 'nu cusciùne abbuttunatu!


   -No, no..Ma sienti. Si ccussì te piace,
Minte 'stu grassu grassu intra 'stu pane,
Ca m'o spizziju sabatu, demane,
A ra salute vostra  e 'nsanta pace.-
   Ccussì fo' ffattu.Pantu, a 'nu vulùne,
A ra casa scappau cumu 'nu pazzu,
E, ssenza tanti scrupuli de lazzu,
Fice de chir'aglire 'nu vuccune.
     

                          Conflenti, 3 agosto 1903