CULU TUNNU

Culu tunnu - video Conflenti 22 agosto 2012

Visita a Gradisca alla tomba di Vittorio Butera -2007

Al prof. Tommaso Pontano

Tumà, sai quantu pisu? Annu passatu

 Èra d’uttanta rùotula a ru gruossu;

 Mò sugnu nuvant’unu, purpa ed ùossu,

Ch‘a pasta de Gragnanu m’ha ggiuvatu...

E ddire cca t’avìa ppropiu juratu

De me mannciare arùculi de fùossu

E dde vidìre pènnere mpicatu

A ri travi ‘e sazizze e ru mastruossu!

Ma pùe, cchi bbùe de mie? L ‘autra matina

Zerte suppère curme e maccaruni

Me purtaru dde nùovu a ra ruina...

O razza cujjintara de manciuni,

 Chi gridamu: San Pàulu! a ggargia chjna

Sulu quannu nn ‘affruntanu i curzuni!...

Ppe' Rrusarinu Custanzu

De ticini ‘nu vùoscu e dde castagne

 Ammanta ra curìna’ ‘e Rivintinu.

 Ppe’ bbantu e pped’unure ‘e ‘ste campagne,

 Mmienzu, ‘na vota, cce criscìa ‘nnu pinu.

Dirittu, senza ‘mpruoccu nnè mmagagne,

Era dde ggemme putiruse chjnu.

Quant’aggielli cce su’ ppe’ ‘ste muntagne

Le cantavanu ‘ntuornu ogne mmatinu.

‘Nu juornu, ccussì bboze  ru distinu,

Passau ra morte ppe’ Ddicollatura

E ccu ra fàuce se struncàu ru pinu.

Juornu de luttu! Juornu de spintura!

Cianci, povara Serra de Buttinu,

Pirdìmme ‘a gemma cchiù gintile e ppura!

‘A funiculare ‘e Catanzaru

‘Nu binariu chi cala

A ru pede da’ Sala.

‘Na rota chi d’azzaru

‘Nu sciartu ha ppe ccullaru.

 Due carrozze. Nu paru

 De cuntrappisi appisi:

Eccu ‘a funiculare ‘e Catanzaru.

De quannu fò ccriata,

L’arte chi fa a jjurnata

 E’ ssempre ‘a stessa: scìnnedi

 ‘A carrozza suprana

E, ppari passu, sàgliedi

‘A cumpagna suttana.

Chilla chi fa ru juoco

‘U sai chi n’è? Nnu puocu

D’acqua chi vene mmisa,

Sulamente a ra scisa,

Intra nu cuntrappisu.

Aumintannu de pisu,

Chillu fa fforza e ttira.

‘A rota ‘e supra ggira

E re carrozze mmutta:

Chilla de supra scinnedi

E ‘nchjana chilla ‘e sutta.

-Allura me figuru —

Dice nnu passeggieri

— Cum‘è rringrazziata

L‘acqua chi fa ssa sorta de lavuru —

—Se capisce! Sicuru! — Rispunne ru trammieri

—Cumporma arriva sutta

Vene Jjittata tutta

A nnu cavùne scuru! —

Chira cicata porca de furtuna

De chissi premi, a cchi fatiga, duna!

Riccà, famme sapire

Avv. Riccardo  Folino con il nipote Riccardo

Riccà, famme sapire

Quantu te riestu a ddare,

 Ppecchì bbùogliu finire,

 ‘Na vota, ‘e te pagare.

T’haju mannatu a ddire,

 Ccu ttanti, de me fare

‘Stu càncaru ‘e piacire;

Ma tu nu’ bbûe arricchiare!

‘Un criju ca pirdire

‘A carma me vûe fare...

Pperciò, mànname a ddire

Quantu te rìestu a ddare,

‘U cuntu ppe’ cchiudire

E ppe’ tte ringrazziare.

Cataro e Zaro

‘U sai ppecchì ‘stu caru

Paise miu se chiama Ccatanzaru?

Sicunnni tanti e ttanti

Se chiama de ccussì

Ppecchì, ccica, ‘nu paru

De timuti briganti,

Unu chiamatu Càtaru,

‘N’autru chiamatu Zaru,

Tant‘anni arrietu si cce fravicaru,

Ppe’ pprimi, ‘nu pagliaru.

‘Nu granne dottu,

‘Nu ciarviellu fìnu,

Chiamatu Ddo’ Lluice Sittimbrinu,

Dice ca Catanzaru,

Stannu a ru grecu e stannu a ru latinu,

Vo’ ddire’, s’haju bbonu capisciutu,

Paise natu mmienzu a ru jurutu.

Sicunnu mie, chi ‘ud’haiu nulla scola,

Criju ca ‘ssa parola

Vene dde CA TA: cchiù e NZARU: azzàru.

Bbo’ ddire ca tutti, cchiù ca simu,

A capu cce l’avìmu

Cchiù tosta de l’azzaru.

Uniter di Lamezia - 7 marzo 2012

Foto della serata dedicata a V. Butera all'Uniter di Lamezia con la dottoressa Giuliana Paola

Mete

Ma guarda tu ‘nu puocu

Quante ciutìe nne cunta:

«Col ferro e con il fuoco

La meta è già raggiunta!»

Raggiunta? A mmie ‘u’ mme pare.

Ppecchì tra illa e ‘nnue

Cce sta dde mmienzu ‘u mare,

Ccu re timpeste sue.

‘A mèta talìana

 Era la libbirtà,

 E chilla èdi luntana

‘U’ sse sa qquantu ‘e ccà.

Si pue, pped’illu, ‘a mèta

 Era ra mal’annata,

‘A fame e ra dieta,

 Allura... è surpassata!

‘A casa mia (al dott. Giovanni Paola)

ruderi della casa di V. Butera

Giuà, chi mu te vija bbenedittu!

Chi mu te vija, cchiù ca sì, nnu Santu!

Avìa nnu furnu, te gravàva ttantu

E tte sì statu citu! E’ nnu dilittu!

Si mo chi catte, — finarmente! — hai dittu

Mpastidiscire t’ha ddivutu tantu!

E ttu, pardiu, ppecchì nu’ mme l’hai dittu?

L‘avèra spravicatu tuttu quantu!

Criju ch’armenu a mmie nu’ nn’hai ‘ncurpatu

Ppecchì, si curpa cc’edi, cce l’hai tuni,

Chi ppe ttant’anni nu’ d’hai mai parratu

Ca iu cchi nne sapìa ca tri mmattuni,

Cari a stu core miu chi cc‘era nnatu,

Te dàvanu fastidiu a ri... buttùni?