OMAGGIO A VITTORIO BUTERA

Premio

Vuci - Voci

- si 'e vuci  chi camminanu su' bbere.
ha ddittu 'nu maritu a ru mugliere
i ciervi tutti quanti
vienu dde mo' nn'avanti
ad unu ad unu zimmullati a mmare.
E tu cchi nne vue fare?-
Le disse ra mugliere
pure ca sunu vere
tu sai tantu natare...

Girannula

Dimme 'na cosa: è bberu o pigliu sparu?
Tu nu' ssi  Ffrascantoni De Liune?
Chillu chi mo fa ll'annu era a ggarzune
Ccu cchiru malanova 'e piecuraru?

Ere cchiù nniuru tu ca 'u carvunaru
Portave a spassu tantu 'e cinturune.
Tinie d'aquila 'mprunte nu picciune
e parca 'u munnu te muccave paru.

Moni hai canciatu all'abitu culure:
'na scolla russa e 'nna faciglia 'mmanu.
Cumu va? Te si' fattu mietiture?

- Cchi mietiture? Circu mu m'arranciu
e passu d'unu a 'nn'autru capitanu
Ppe  mme firmare dduve miegliu manciu!

L'urzi

L'urzu niuru dicìa: - Sugnu sicuru
Ca tutti l'urzi su' dde pilu scuru. -


- Guarda bbuonu - le disse ll'uorzu jancu
. ca chjari ancora cci nne su' chi mancu !-

CULU TUNNU

Culu tunnu - video Conflenti 22 agosto 2012

Visita a Gradisca alla tomba di Vittorio Butera -2007

Al prof. Tommaso Pontano

Tumà, sai quantu pisu? Annu passatu

 Èra d’uttanta rùotula a ru gruossu;

 Mò sugnu nuvant’unu, purpa ed ùossu,

Ch‘a pasta de Gragnanu m’ha ggiuvatu...

E ddire cca t’avìa ppropiu juratu

De me mannciare arùculi de fùossu

E dde vidìre pènnere mpicatu

A ri travi ‘e sazizze e ru mastruossu!

Ma pùe, cchi bbùe de mie? L ‘autra matina

Zerte suppère curme e maccaruni

Me purtaru dde nùovu a ra ruina...

O razza cujjintara de manciuni,

 Chi gridamu: San Pàulu! a ggargia chjna

Sulu quannu nn ‘affruntanu i curzuni!...

Ppe' Rrusarinu Custanzu

De ticini ‘nu vùoscu e dde castagne

 Ammanta ra curìna’ ‘e Rivintinu.

 Ppe’ bbantu e pped’unure ‘e ‘ste campagne,

 Mmienzu, ‘na vota, cce criscìa ‘nnu pinu.

Dirittu, senza ‘mpruoccu nnè mmagagne,

Era dde ggemme putiruse chjnu.

Quant’aggielli cce su’ ppe’ ‘ste muntagne

Le cantavanu ‘ntuornu ogne mmatinu.

‘Nu juornu, ccussì bboze  ru distinu,

Passau ra morte ppe’ Ddicollatura

E ccu ra fàuce se struncàu ru pinu.

Juornu de luttu! Juornu de spintura!

Cianci, povara Serra de Buttinu,

Pirdìmme ‘a gemma cchiù gintile e ppura!

‘A funiculare ‘e Catanzaru

‘Nu binariu chi cala

A ru pede da’ Sala.

‘Na rota chi d’azzaru

‘Nu sciartu ha ppe ccullaru.

 Due carrozze. Nu paru

 De cuntrappisi appisi:

Eccu ‘a funiculare ‘e Catanzaru.

De quannu fò ccriata,

L’arte chi fa a jjurnata

 E’ ssempre ‘a stessa: scìnnedi

 ‘A carrozza suprana

E, ppari passu, sàgliedi

‘A cumpagna suttana.

Chilla chi fa ru juoco

‘U sai chi n’è? Nnu puocu

D’acqua chi vene mmisa,

Sulamente a ra scisa,

Intra nu cuntrappisu.

Aumintannu de pisu,

Chillu fa fforza e ttira.

‘A rota ‘e supra ggira

E re carrozze mmutta:

Chilla de supra scinnedi

E ‘nchjana chilla ‘e sutta.

-Allura me figuru —

Dice nnu passeggieri

— Cum‘è rringrazziata

L‘acqua chi fa ssa sorta de lavuru —

—Se capisce! Sicuru! — Rispunne ru trammieri

—Cumporma arriva sutta

Vene Jjittata tutta

A nnu cavùne scuru! —

Chira cicata porca de furtuna

De chissi premi, a cchi fatiga, duna!