'I vagni 'e Caronte

‘I vagni ‘e Caronte

Rugnusi, squallarati,

Cinanchi, scudillati,

Ciunchi, sciancati, muti,

Sbalinchi e ccuoscinuti,

Vinìtive a Jjittare intra ‘sta fonte,

Si vuliti sanare, de Caronte.

Rizette, midicine,

Miedici, spizzìrìe,

Su’ tutte mpacchiatine,

Su’ tutte fissarie.

‘E radiche pistate,

‘E carte sinapate,

Su’ ppropiu cumu l‘uogliu quadijatu

A cchira banna untatu:

Unu spenne, se minnica,

Resta cciuncu e sse strafrica!

Ma si vo’ ppe mmu se cura,

Mu se sana e sse spricura,

S’ha dde jire a  ‘mpruscinare

A ra fonte

De Caronte!

Chilla è nn’acqua

Ch ‘a ri muorti puru cole;

Chine vadi e ssi cce sciacqua

Chira banna chi le dole

Intra mancu na simana,

Granne o picciulu, se sana!

Nesce ll’acqua surfurigna

De na petra carcarigna;

Fà nna gorna e bbulle ppara

Cumu dintra na quadara;

Nnè cce vuolu ffrasche e lligna,

Ca l’attìzza nna magara.

Mo, llà d’intra, amicu caru,

Cc’è nna vera spizziria:

Cc’edi fierru, cc’edi azzaru

E cc’è... mmarva primintìa.

Cc’è brumuru,

Cc ‘è juduru,

Cc’è nnitratu

E cc’è ssurfatu,

Chi s’aggiuva

Ttantu a ll’uva,

Te figuri a nnu malatu!

  A bbuntà dess’acqua è ttanta

Chi ‘u r’appatta ll’acqua santa!

Chira cagna de quadara,

Dduve attizza ra magara,

Quannu vulle ppara para,

Fa mmiraculi a mmigliara.

 Iu cuntare nne putèra

Nna filèra; ma na dea ppemmu n ‘aviti

 vinne dicu tri, sentiti.

A ra Bella nu quatraru

caminavadi accruccatu.

Edi jutu,

s’è jjittatu

paru paru

 a chir’acquaru.

E ru mpisu,

doppu mancu nu minutu,

nn‘è nisciutu

n ‘atra vota addirizzatu,

tisu tisu

e azzariatu.

I dicotti

e ri cirotti

ti l’avianu lassatu

accruccatu,

ammusciatu

e sminnicatu.

A nna ciopa de Sammata

de na banna delicata

le pennia na cosa ujjata...

Povarella a nna forzata

cica s’era sguallarata.

U dutture le dicia:

bella mia chista è guallara mvicchiata

 e cce’ vo’ nna fuorficiata.

 ppecchì l’uogliu quadijatu

cc‘è appizzatu.

Si te spagni

 va’ a ri vagni.

 Lla te crepa ssula sula,

 e scula e ssana

 a nna simana.

Chilla è juta,

 s’è sciacquata

 chira bbanna dilicata

 e a Sammata

 senza vummula è turnata!

Chi ffuntana:

cula, scula lava e sana!

Na quatrara ‘u’ ffacia ffigli

u maritu nne vulia

e r’affrittu, spersu jia

pe pariri e ppe ccunsigli.

Capitannu ad Angillitu

 ccu ‘nu ciuotu de maritu,

 a ddo Mmicu ccè trovau

 e ru... ru... cunsurtau.

-S’è ppe cchissu chi te lagni

 udd’avire nulla pena!

 Vieni, fatte quattru vagni

a Ccaronte e... niesci prena.

 Cumu mpatti mi si dice

 ch‘ari nove misi fice

‘na pariglia,

 ‘na cucchiata

 ch ‘assimiglia spiccicata

 a r’amicu miu ddo Mmicu!

‘U maritu grida ancora:

oh! cchid’acqua flgliarola!