‘u mierulu e ru viscignuolu

   Chira notte, n’agiellu

cantava ccussi bbiellu,

cantava ccu nna vuce

ccussì  tènnara e dduce,

chi successe llà ‘ntuornu ‘nu ribbiellu.

   Ogni ffrusculu tannu ammasunatu

se rispigliau ‘ncantatu

e ppe sse ‘mmarzamare

l’anima a ra canzona

chi sagliadi a ra luna,

stinnìa re ricchie e trattinia ru jatu.

   Era nnu viscignuolu chi cantava

Intra nu ruvittaru

e cchiru cantu chiaru,

tennaru, friscu, caru

a ru core parrava!

   Cchid’accientil

Cchi lamienti!

Cchi ttirate

‘nzuccarate!

Cchi bbutate

appassiunate!

   Chira vuce

ccussi dduce,

zerte vote de lamientu,

zerte vote de cuntientu,

ccu ru vientu

l’ariu l’ariu se spannia,

 jia, vinìa

e mmintia

a ru core ‘na ciumia

mo de ggioia e dd’alligria.

mo de chiantu e ppucundria.

   Nu cane ch’ogne ttantu

ppe ffare nu dispiettu a ra furtuna

latravadj a ra luna,

chira notte, a ru ‘ncantu

tennaru de ssu cantu

luntanu e appassiunatu,

ristau ccu ru langùru a mmienzu jatu.

   Na ciuccia spinturata,

a cchira jumarata

de suoni e dd’armunia

ch’a ru cielu saglia,

fo’ tanta l’alligrizza

chi ruppe ra capizza

e ssupra l’erva, china

de coccia d’acquazzina,

se fice qquattru o cinque ‘mpruscinate

ppe’ ra gran cuntintizza!

   Doppu nu quartu d’ura,

chiru cantu finiu.

Ma de na troppa scura

‘na vuce se sintìu;

   ‘U viscignuolu dicènu ca ‘ncanta

ra gente, quannu canta.

È’ bberu; ma fa sempre  na sunata

E mmo putèra dd’essere canciata.

Ca pare, arrassusia,

A tiritela de ‘na litania!

-        

   -Chin’è ssu criticu

 malu parrante? –

disse nna pullula

menza giurante!-

-Chine po’ dd’essere?

N’autru cantante!

Cumu  mpatti era statu

nu mièrulu abbragàtu !