Franciscu, Fidile e GGatanu

Cumpari Franciscu,

Sidutu a ‘nnu friscu,

Se preja’ ra vigna

Ch ‘a ccùnchiere ‘ncigna

E, ttuttu fllìce,

Le dice:

— Hai vistu ccu qquantu

Amure te chiantu?

Te zappu, te putu, te ligu,

Te’ ‘nzurfu e ssulligu.

‘U mise d’agustu

M’affriggiu⁷ s’hai site...

- Ca pienzi a ru mmustu!

Le disse ra vite.

Cumpari Fidile,

De putu summastru,

‘U mise d’aprile

Se ‘nzerta ‘nn‘ugliastru

E, ttuttu filìce,

Le dice:

— Chiantune, curaggiu!

Nascisti sarvaggiu;

Ma iu, ccu ‘ste manu,

Te fazzu cristianu!

A ddire ‘u’ ss’arriva

Chi bbene te vùogliu...

— Ppecchì ppienzi all’uogliu! —

Le disse r’aliva.

Unnija’ ru grànu,

Si jata ru vientu.

Cumpari Gatanu

‘U guarda ccuntientu

E, ttuttu filìce,

Le dice:

- Filillu de paglia,

Hai vistu battaglia.

Ppe’ ttie chi cummattu

Mu crisci cchiù cchiattu?

Vicinu o luntanu,

Nne fazzu fatica...

- Ca pienzi a ru granu! —

Le disse ra spica.