Cani grassi e ccani lienti

‘Nu cane, pella ed ossa ridduciutu

Dìssedi a ‘nn’autru cane, chiattu chiattu:

- Se po’ ssapire cumu pesta hai fattu

Ppe’ tte ‘ngrassare tantu a ‘nnu minutu?

Pari, santudiàmmanu, ‘na vutte,

Mentre, pardiu, ‘st’astate

Ti se vidìenu tutte

‘E povare custate!

— Eh, bbiellu miu, a ‘stu munnu

Cce vo’ ssapire fare;

Unu s’ha dd’arranciare

Si se vo’ffare tunnu,

Ed iu, se sa, m‘arranciu...

Dduve cchiù mmiegliu manciu.

‘Stu ‘mprima, ccu ‘nn’avaru

‘Ncappai de piecuraru,

E, ccumu ca ‘n dinaru

‘E spise me facìa,

L’ossa de fore avìa;

Ma mo sugnu a ggarzune

Ccu ‘nn ‘àncilu ‘e patrune,

Chi me vo’ ttantu bbene

E mme tratta cchi mancu.

Figùrate, me tene

A ccasu e ppane jancu.

Vìenice puru tu. Cchi mministalla!

A ru mise te fai cumu ‘na palla!

- Quasi quasi vinèradi; ma llà

Va vide cchi ffatiga chi se fà!

‘U juornu a ccaccia, ‘a notte guardianìa

Ed iu chiù viecchiu sugnu,

‘A virità, m ‘addugnu

Ca nud’è ccosa ‘a mia.

— Ah, chi te vija ssantu!

Si fatigare tantu,

Juornu e nnotte, s’avìa,

Te pare ca iu cce jìa?

Llà bbasta mu te stai,

D’’a sira a ra matina,

Ligatu a ‘nna catina

Senza latrare mai.

— Davèru? — Chista è ffide! Vienitìnnne!

- Gnornò, ccumpagnu caru.

‘A libertà ‘u’ sse vinne

Ed iu, ppe’ nnun purtare ‘ssu cullaru,

Prefirisciu a ra fossa.

Scinnìre pelle ed ossa! —