Perdugnu

 A Peppinu Casalinuovu

   Vuliti pirdunatu e bbe pirdugnu;

 Ma 'u' mme chiamati frate!

 A mmaleppena 'nu picuozzu sugnu

Mentre vue siti 'nu guardianu... patre.

7 settembre 1935

Cunsigli

Pecchì nu' sacciu cchi ll'aviadi fattu

'Nu cane era a ri fierri ccu 'nnu gattu.

- Judica  tu chi si' 'nnu Salamune-

Disse ru cane crozzu a ru patrune

 - S'aju tuortu o ragiune-

      - Tuortu!- E pecchì? -    pecchì, 'mparte 

                                                mu 'u scanni,

Vai faciennu 'ssa sorte d'addimanni!

 17 ottobre 1939

Mulina, mulina, mulina. Al dott. Michele De Vita

Michele ha ddue mulina. A ru suttanu

'ntrimoja jjizzu  e spurnadi scagliola;

 All'autru minte ggranu e, dd'ogne mola, 

 Viecchiu all'arte cum'è, caccia farina.

- Duttù, viatu chi se po' arranciare!

Mpirò, stàtive  attentu a ru 'nsaccare

 Ca si pigliati 'u Jizzu ppe' ffarina 

Nne  nasce 'nna ruina!

E, ccumu 'mpatti, sputa ch'addimina,

'Ntramente 'na pacchiana (sempre chilla!)

Le stava manijannu 'a livatina

Li se 'ntustau ra pasta a ra majilla!

 Disse ra povarella: 

- Ddo Mmichele ha spagliatu de cirmella! -

3 ottobre 1939

'U specchiu

 'U specchiu 'e 'nu varvieri 'n fallimentu,

De notte, a nu catuoju fo' ammucciatu

Ppe' ru sarvare d''o pignuramentu.

Sintiennu tanti scrusci d'ogne llatu

 Disse :- Madonna mia, quanti rumuri!

Va vide dduve sugnu capitatu!

Ma quannu s'àddunau, a ri primi arburi,

 Ca 'ntuornu avia 'nna mandra de muntuni

 Ccu re corne a ffaciglia 'e mietituri.

- Menu male! - diciu rassicuratu.

- Haiu sulu de zàccanu canciatu -

2 ottobre 1939

Prudenza

 All'Avv. Antonio Mastroianni Conflenti

I sordi su' 'nna mala tantazione

Spariscenu a ru minimu Jujjune

 E puru ca nu' si' scialacqune

Parica tienu 'n cuorpu 'a dannazione.

 Eccu ppecchì dde nuovu ppe' prudenza,

Pagu e ringrazziu prima d''a scadenza!

 27 sett. 1939

CChi munnu

 ' U munnu s'è ccussì  'mputtanisciutu

Chi, cum'è bberu Ddiu, riestu 'ncantatu.

 Vicienzo fuballista è ddivinutu

E Cicciu a ssissant'anni è 'nnamuratu.

Saveriu pisce d'acqua s'è ffaciutu,

Vittoriu va scapilli ed è ppilatu,

Michele de cudilla s'è cchjcatu

E Ddo Riccardu 'e nieru s'è bbistutu.

Ma 'nsumma, cchi ppe' crivu è ssuccidutu

'U munnu capisutta s'è bbutatu

O sugnu iu chi 'a vista haju perdutu?

Ccu ttutta quanta 'a forza ch'haju avutu

 Stamatina me sugnu scaffijatu

Ed haiu dittu; o sieculu curnutu!

14 settembre 1932

Spegate

   Pippì, si nu' mme  dici cumu e quantu

'Un te capisciu supra nullu puntu.

  Cchi cc'intradi ccu mie Ddon Carru quintu

 Si 'ud'amu avuti mai nisciunu accuntu?

se vide ca 'u' sai cchiù  cumu me chiamu

E mme cumpunni ccu Franciscu Primu.

- Gnornozignore! - Allura  cc'è 'nnu spagliu

-Gnorzisignore. - Allura tantu miegliu!

 E bbide mu se fà ppuru capace

L'amicu caru nuostru Ddo' Lluice.

29 agosto 1935

Pippì: Peppino Casalinuovo

Luice: Luigi De Franco

Distini.

  Gualu, cumpagnu è ru distinu nuostru:

Nnabbiviramu  tutti dui de ''nchiuostru.

Ma 'na pinnata de Vussugnuria

Nne vale ccientumila de 'na mia!

22 agosto 1935

L'apa e ru jure

 'N'apa supra 'nu jure 'e margarita

 Firmau ru vuolu pp'arrubbare 'u mele;

Ma cce truvau 'nna lacrima de fele

 E cce appizzàu ra vita.

' A gente disse:  - No supra 'stu jure

 L'apa si cce ppusata

 Surtantu pped'amure;

 Si nn'era 'nn'ammurata.

 Ccussì ri furti cchiù qualificati

Pàssanu pped'amuri spurtunati.

 3 agosto 1935

Apizzau: perse

Il Riduce

  Dopo l'avvenimento 

 Del dodici per cento

Ognuno chiama il Duce,

 A ragione, il Riduce.

28 gennaio 1932

' A cammisa...janca

 ' Mpitta a 'nnna corda. 'na cammisa janca,

Ogne ttantu s'abbuffa a ru libbicce;

S'ujja dde vientu. 'E maniche spalanca.

 E  ru munnu è ru miu, parica dice.

 Ma 'mparu chiru vientu cchiù  nnun jujja

'A cammisa, a 'nna botta, se dijjujja.

Vascia re vrazza , 'e due fadelle stenne

 E mmuscia muscia 'e chira corda  penne...

30  giugno 35

  Cortile di Trilussa

Cunsigli

 All'Avv. Luigi De Franco

Caru Luice, basta!

E ddice a cchir'amicu ca 'ud'ha rrastu:

 Tuccannu sempre 'nu pardiu de tastu

' A cosa nu' sse conza, ma se guasta!

rastu : fiuto

Botta (scrive Caruso)

 Cc'era'nnu pitinusu

 Chi, mparu l'accuria

A Battista Carusu

Ppe' cunsigli curria.

' Na vota a 'su mischinu

Dissi de me mannare

'Na vummula de Vinu;

Ma sempre ccu ppagare.

Edi passatu n'annu

E nnu' mm'ha cchiù scrivutu

Ancore sta ttrimannu

Ppe' ru cacacchiu avutu!

 E cchissa fo' ppagura!

Amicu cujjintaru,

Hai fattu 'na figura

 De veru cacaturu!...

23 settembre 1923

Uomini 'e parola

 Iu de parola, t'assicuru 'u' mancu,

Ma Luice De Francu,

 Si dice nniuru è jjancu.

Si  dice 'mpannu, è 'mpunnu

Si dice qquatru, è ttunnu.

Si dice ssupra, è ssutta

Si dice bbella è brutta.

 Si dice mmoni è ddoppu

Si dice ppuocu è troppu.

 Si dice vaiu, vene

Si dice mmale è bbene.

 30 dicembre 1932

Pasqua fiorita.

   Donna Flò, t'avia ccircatu,

Ppe' 'sta Pasqua, 'nu  martinu;

 Cumu va chi m'hai mannatu

 Chista rota de mulinu?

 ' Na cuzzupa ccu ccinqu'ova

 Sai  cchi prova?

 Ca si' ttroppu ginirusa

 E nnun s'usa.

Iu te mannu 'na juccata

 D'ova niure ' cicculata.

Primavera

  Cara cummari, è primavera. Vene

De luntanu n'adduru de viole.

Iu me sientu'na cosa intra 'ste vene.

Chi nun t''o sacciu dire ccu parole.

Cchiù Cchiù

   S'ogne bbota te sciegli mu me chiami

I juorni chi 'un ce sugnu,

Sempre de cchiù m'addugnu

Miché ca cchiù nu' mm'ami.

           Iu no. Quntu cchiù amare su' re pene

Tantu cchiù, Ddo' Mmiché, ti vuogliu bene.

!5 marzo 1933

suttamanu

 

............................................

Chillu chi  nun po' ffare

'U dirittu romanu,

'U fa caru avvucatu
Nu buonu suttamanu.

........................................

suttamanu: mancia

Sempre a mmuollu

 Ah, cchi munnu sciliratu!

e  cchi bbita 'nciuotisciuta!

Mmenu  male ca 'nne datu

 De nne fare  'na futtuta!

  Zerti juorni, mi  nne fazzu

Cchiù ca puozzu... Nove, dece...

E ssi forra tuttu cazzu

 Sterra sempre intra 'nu cece!

Amure Giuvine e ccinquantinu

  A bbint'anni vastàvadi 'nu jure

Ppe fare ccu 'nna fimmina a r'amure;

A ccinquanta cce vodi 'na catasta

 De biglietti de banca e mmancu vasta!

9 gennaio 1928

' A maruzza

  'Na  maruzza sagliuta chianu chianu

Supra n'arcu rumanu,

guardau ra strada fatta

E ddisse  a ra licerta de 'na tana:

- Supra sta terra nostra taliana

'Un  c'è chine m'appatta;

Si n'autru  pocu 'nchianu,

Nne vidi vattimanu

 E nne vidi alalà.

 - Se capisce! Se sa!-

Le disse ra licerta.

- Si' ttantu granne tantu lesta e sperta

Chi 'ss'unure te tocca bbiramente;

Ma cchiù pprinciparmente

Ppe' ra vava lucente

 chi lassi

 Dduve passi!

30 settembre 1935

Chiàmate 'u cane

 - Cumpari 'Ntò, chiamative 'ssu cane

Si nno le sparu 'mprunte 'na pallata!

- Pristi ccà. Pristi ccà. grann'ammazzata

Si vue ristare ccu re gamme sane.

Tutti mali

 Pecchì, mmo tutti quanti

'Ssi munni sunu chini

 De latri e de briganti

 De puorci e dd'assassini?

- Ppecchì? Ppecchì s'è bberu ca nascimu

I mienzi bbuoni e ll'autri mienzi mali,

Mentre i mali ristamu tali e quali

 i bbuoni cchiù briganti nne facimu.

17 ottobre 1939

Zampugne scasciate

 Al Comm. Michele Galatà

Cch'è ssucciessu? Te mannu ogne ssimana

Mo   'na littira e mmo' na  cartulina,

E ttu, fattu cchiù ssurdu 'e 'na campana, 

Te bbuzzari de Peppe e de Rusina!

Mo ccu  ddui vierzi e mo ccu 'nna quartina,

'A musa mia fin'a ssu Ruma 'nchiana;

Ma tu, pecchì è  bbistuta de pacchiana, 

'A tratti cumu l'urtima mappina!

 Capisciu: 'na zampugna paisana

Ppecchì nnud'ha ru suonu 'e l'ocarina,

Ha d'essere mintuta 'n quarantana.

 Ma nu' me pare giustu, pardiana,

Mu mentre 'u core miu ti s'abbicina,

'U tue de  'ssa manèra s'alluntana.

   21 settembre 1939

Gola e spada

 Dissedi 'nu cantante a 'nu manciune

- Nnammazzadi de cchiù

 'Nu cannaruozzu ca nu sciabulune.

- Sicuru, nn'hai ragiune.

 E 'mpatti quannu canti

Ammazzi ttutti  quanti !-

22 ottobre 1926

' A sanguetta e ru malatu

  A ra sanguetta disse 'nnu malatu:

- Te vuogliu tantu bene

 Chi 'u sangu de 'ste vene

 Te dugnu  rigalatu.

 È bberu. Si' 'nn'amicu affizziunatu-

Rispunniu ra sanguetta 'e 'nu pantanu,

- Ma iu vulera cchiù ssangu de sanu

 ca sangu  de malatu!

 17 ottobre 1939

'A CICALA E RA FURMICA (2)

  - Cicà, vorra ssapire pecchì ttu,

 Chi m'ha' fattu  'st'astate. 

Tutte chire cantate, 

Moni nun canti cchiù-

 Nulla risposta. 'Na furmica astuta

 Chi saglia muru muru,

Disse: 'U'  lu sai ch'ogne  cicala ammuta

 A re prim'acque de castagnaturu?

A mia nipote Sara. Venezia

  A mia nipote Sara

 Che tante lingue impara,

Questo modesto saggio

 Di  canti conflentari

offro perché del pari

il nobile linguaggio

 Della mia terra impari.

2 gennaio 1947

' U Suvaru

 È ru suvaru 'nu tappu

Chi me serve pp'ammullare

 Quanti grubbi apierti 'ncappu

Dduve e quannu cchiù me pare.

Signorzì; ma l'arte, pensa,

Ca   vo' usata ccu prudenza'

 Cà si 'mpili a'ncunu cuollu

dilicatu de buttiglia, 

Po' succedere 'nu 'mbruogliu

Chi sbrigogna 'nna famiglia.

6 maggio 1922