‘U tamarru e l’apuni

‘U tamarru e l’apuni

‘Nu tamarru, paglia e ffuma,

 S’era mmisu ppemmu asciuma 

Pparu paru,

‘N’apunaru,

Chi, ‘ngrubbatu a ‘nna sulagna

Vecchia tana de castagna,

‘U’ lle dava, ppovaracciu,

 Nullu ‘mpacciu.

-Ppe’ ppiatà, nu’ nn’asciumare!

Le dicìu ru cchiùd’anzianu.

- Si ‘sta paglia hai de vrusciare,

Vrusciatìla cchiù lluntanu,

Cà, sinnoni, a ‘stu cupune,

Nun cce resta cchiù ‘nn‘apune –

Ma, tamarru, paglia e ffuma,

ChiIlu parra ed illu asciuma!

-Sissignore, ‘a mala ggente

Nn‘ha ppe’ bbili e ppe’ bbriganti;

Va dicìennu ca ppe’ nnente

‘Ncindrillamu  a ttutti quanti;

M’apprittati si nu’ ssimu,

Nun puncimu.

Tu l’avere de sapire

Cchiù dde tuttu ‘u vicinatu;

A ttant’anni t’hamu datu

Mai ‘nu sulu dispiacire?

Pperciò, làssane campare;

Ppe’ piatà, nu’ nn‘asciumare -.

Ma tamarru, paglia e ffuma,

Chillu prega ed illu asciuma.

- Nn’hai lassatu intra ‘sta tana

Sempre criscere e ccampare;

Si, a ru cchiù, ppe’ ‘nna simana

Nni cce lassi ancòre stare,

Quann’è ssabatu sciamamu

E ffastidi cchiù ‘un te damu.

Ma si vûe mu te lassamu,

Puru moni, ‘stu cupune,

Dicennìlu e nni nne jamu

Tutti quanti a ‘nnu vulune:

Senza paglia e ssenza fuma,

Cumu s’usa e sse custuma

No’ tra ggente cumu a bbue,

Ma tra apuni cumu a nnue...-

Ma tamarru, paglia e ffuma,

Chillu prega ed illu asciuma.

Ah, ppe’ Jjuda! Allura tu

 ‘U’ ra vûe finire cchiù?

E mmò vidi, tamarrune,

Cchi ssa ffare e ffà ‘nn ‘apune!

- Guardia armata, avanti avanti,

Ve cummannu mu viniti

A r’assartu tutti quanti! -

Sette apuni - apune avanti -

L ‘assartàru e ll’azziccàru,

Quali arrieti e qquali avanti,

Quattru para ‘e puncigliuni,

Ccussì ‘nchjnu e ccussì fforte,

Chi, ppe’ cchir’ascìumicante

Fo’ ra morte furminante.

Ogne apune, puru illu,

‘Mparu perze ru cindrillu,

 Si nne jiu a ri Campalisi;

 Ma surdati e Ccapitanu,

 ‘Nterra stisi,

 Murmuraru cchianu chianu:

-‘A mminnitta,

Quann‘è ggiusta,

ppe ‘nnue è ssempre beneditta,

Puru ‘a vita si nne custa! -