'u cardillu e ru gattu -l'usignolo e il gatto

‘U cardillu e ru gattu

‘Nu gattu mustazzutu
Ha ddittu a ‘nnu cardillu spinturatu:
- Chillu chi t’ha ttinutu,
Tant’anni carciratu,
Stu munnu hadi lassatu
ed a ri Campilisi si nn‘è jutu.
Cumu miegliu ha bbulutu
T’hadi mintutu ‘n cruce:
Ma mo chi puru ccà,
De nuovu torn’è lluce
‘Nna spera ‘e libirtà,
Ppecchì tte riesti ancore
Intra ‘ssa caggia ? Vieni niesci fore...
Tuni chi ppe’ ttant’anni
De l’amare catine
Hai suppurtatu i danni,
Mo ch’è bbinutu ‘n fine
‘U regnu de l’affanni,
È ggiustu ppemmu tutti
Te gùodi de ssa morte
I meritati frutti.
Niesci, cumpagnu. Iu te spalancu ‘e porte
De ‘ssa pardiu de caggia:
Ccussì dde mo ‘nn ‘avanti,
D’amure ‘nno dde raggia
‘Na canzuna, me canti…
Nne vûe sintire una? –
Rispunnìu ru cardillu.
-Tuni si’ ppieju ‘e chillu!
E, ccu ‘ssa malanova de pitittu
Chi tieni, cumu niesciu,’ sugnu frittu!
Pperciò làssame stare...
Tantu, a ra frusta ‘u callu cce haju fattu
Ed è mmiegliu a ‘nnu carciru ristare
Ca finire a ra panza de ‘nu gattu! -



glossario:
mustazzutu: baffuto
spinturatu: sfortunato
caggia: gabbia
raggia: rabbia