Niente rose, crapietti!

 Doppu che sugnu muortu, s'ogne ttantu

vieni a ru campusantu, 

'u' me portare juri,

'u' me portare rose,

cà ss'adduri

su' cose

chi  ud'aggiuvanu a nnente.

Portame sulamente

'nu varrile de vinu

e 'nnu crapriettu chinu! 

Pasta d'Alessandro.

  Spaghetti, vermicelli, bucatini,

linguine, tagliatelle, lumaconi,

zitoni. maltagliati, capellini.

ditalini, lasagne, rigatoni,

con altri numerosi fratellini.

Saggiateci, Signori. Al pomodoro, 

al sugo,  al burro, all'uso matriciano,

della vita siam l'unico ristoro! 

 

 

 

Frittulijannu

 'Ngrassata ccu' ra glianna cujjintara,

de puarcu m'è ttuccata 'na minzina.

Passau 'stu viernu i guai de  'na quadara

ed oie le tocca ll'urtima ruina,

ppecchì pisilli e frittule a ra panza

passa de quattru amici d'a paranza. 

 

donn'Artenziu

  Vieni, vieni, ch'arrivi a tiempu giustu!

 Sapissi cchi ccafé  t'haiu stipatu!

 Arté, tene n'aruma!! Hadi 'nu gustu

 Chi cumu a chissu nu' nn'hai mai provatu!

Brinnisi a Silvio Pontano.

 Rifriscate  'ssu mussu,

Amicu, ccu stu vinu:

Ccu' stu  chiariellu russu

Chi fa' ru figliu de zu Costantinu. 

Vinu de saramientu 

Crisciutu a ri Cujjienti. 

Vaccarizzu- Al dott. Giuseppe Colgo

            Cumu ca 'sta cudilla m'hai jaccata

 Aguannu ccu ra raggia de 'nu cane,

Te mannu 'ste tri pruovule silane,

Una, Duttù, pped'ogne curtillata.

Si sunu puocu 'a curpa 'ud'è ra mia,

Ma sulamente de vussignuria.

Me grubbave cchiù 'n chjnu , d'ogne ppizzu

 E a 'st'ura avere avutu 'u vaccarizzu.

 19 marzu 1928

'A Maruzza

 Ppe   ppassare a ra storia 'un ce vo' nnente!-

Dissedi 'na maruzza a 'nnu  sirpente.

È propriu  veru. E ttu , marù, cce passi

Ppe' ra vava chi lassi! -

30  settembre 1935

Maruzza;  chiocciola

Vava; bava

Perdugnu

 A Peppinu Casalinuovu

   Vuliti pirdunatu e bbe pirdugnu;

 Ma 'u' mme chiamati frate!

 A mmaleppena 'nu picuozzu sugnu

Mentre vue siti 'nu guardianu... patre.

7 settembre 1935

Cunsigli

Pecchì nu' sacciu cchi ll'aviadi fattu

'Nu cane era a ri fierri ccu 'nnu gattu.

- Judica  tu chi si' 'nnu Salamune-

Disse ru cane crozzu a ru patrune

 - S'aju tuortu o ragiune-

      - Tuortu!- E pecchì? -    pecchì, 'mparte 

                                                mu 'u scanni,

Vai faciennu 'ssa sorte d'addimanni!

 17 ottobre 1939

Mulina, mulina, mulina. Al dott. Michele De Vita

Michele ha ddue mulina. A ru suttanu

'ntrimoja jjizzu  e spurnadi scagliola;

 All'autru minte ggranu e, dd'ogne mola, 

 Viecchiu all'arte cum'è, caccia farina.

- Duttù, viatu chi se po' arranciare!

Mpirò, stàtive  attentu a ru 'nsaccare

 Ca si pigliati 'u Jizzu ppe' ffarina 

Nne  nasce 'nna ruina!

E, ccumu 'mpatti, sputa ch'addimina,

'Ntramente 'na pacchiana (sempre chilla!)

Le stava manijannu 'a livatina

Li se 'ntustau ra pasta a ra majilla!

 Disse ra povarella: 

- Ddo Mmichele ha spagliatu de cirmella! -

3 ottobre 1939

'U specchiu

 'U specchiu 'e 'nu varvieri 'n fallimentu,

De notte, a nu catuoju fo' ammucciatu

Ppe' ru sarvare d''o pignuramentu.

Sintiennu tanti scrusci d'ogne llatu

 Disse :- Madonna mia, quanti rumuri!

Va vide dduve sugnu capitatu!

Ma quannu s'àddunau, a ri primi arburi,

 Ca 'ntuornu avia 'nna mandra de muntuni

 Ccu re corne a ffaciglia 'e mietituri.

- Menu male! - diciu rassicuratu.

- Haiu sulu de zàccanu canciatu -

2 ottobre 1939

Prudenza

 All'Avv. Antonio Mastroianni Conflenti

I sordi su' 'nna mala tantazione

Spariscenu a ru minimu Jujjune

 E puru ca nu' si' scialacqune

Parica tienu 'n cuorpu 'a dannazione.

 Eccu ppecchì dde nuovu ppe' prudenza,

Pagu e ringrazziu prima d''a scadenza!

 27 sett. 1939

CChi munnu

 ' U munnu s'è ccussì  'mputtanisciutu

Chi, cum'è bberu Ddiu, riestu 'ncantatu.

 Vicienzo fuballista è ddivinutu

E Cicciu a ssissant'anni è 'nnamuratu.

Saveriu pisce d'acqua s'è ffaciutu,

Vittoriu va scapilli ed è ppilatu,

Michele de cudilla s'è cchjcatu

E Ddo Riccardu 'e nieru s'è bbistutu.

Ma 'nsumma, cchi ppe' crivu è ssuccidutu

'U munnu capisutta s'è bbutatu

O sugnu iu chi 'a vista haju perdutu?

Ccu ttutta quanta 'a forza ch'haju avutu

 Stamatina me sugnu scaffijatu

Ed haiu dittu; o sieculu curnutu!

14 settembre 1932

Spegate

   Pippì, si nu' mme  dici cumu e quantu

'Un te capisciu supra nullu puntu.

  Cchi cc'intradi ccu mie Ddon Carru quintu

 Si 'ud'amu avuti mai nisciunu accuntu?

se vide ca 'u' sai cchiù  cumu me chiamu

E mme cumpunni ccu Franciscu Primu.

- Gnornozignore! - Allura  cc'è 'nnu spagliu

-Gnorzisignore. - Allura tantu miegliu!

 E bbide mu se fà ppuru capace

L'amicu caru nuostru Ddo' Lluice.

29 agosto 1935

Pippì: Peppino Casalinuovo

Luice: Luigi De Franco

Distini.

  Gualu, cumpagnu è ru distinu nuostru:

Nnabbiviramu  tutti dui de ''nchiuostru.

Ma 'na pinnata de Vussugnuria

Nne vale ccientumila de 'na mia!

22 agosto 1935

L'apa e ru jure

 'N'apa supra 'nu jure 'e margarita

 Firmau ru vuolu pp'arrubbare 'u mele;

Ma cce truvau 'nna lacrima de fele

 E cce appizzàu ra vita.

' A gente disse:  - No supra 'stu jure

 L'apa si cce ppusata

 Surtantu pped'amure;

 Si nn'era 'nn'ammurata.

 Ccussì ri furti cchiù qualificati

Pàssanu pped'amuri spurtunati.

 3 agosto 1935

Apizzau: perse

Il Riduce

  Dopo l'avvenimento 

 Del dodici per cento

Ognuno chiama il Duce,

 A ragione, il Riduce.

28 gennaio 1932

' A cammisa...janca

 ' Mpitta a 'nnna corda. 'na cammisa janca,

Ogne ttantu s'abbuffa a ru libbicce;

S'ujja dde vientu. 'E maniche spalanca.

 E  ru munnu è ru miu, parica dice.

 Ma 'mparu chiru vientu cchiù  nnun jujja

'A cammisa, a 'nna botta, se dijjujja.

Vascia re vrazza , 'e due fadelle stenne

 E mmuscia muscia 'e chira corda  penne...

30  giugno 35

  Cortile di Trilussa

Cunsigli

 All'Avv. Luigi De Franco

Caru Luice, basta!

E ddice a cchir'amicu ca 'ud'ha rrastu:

 Tuccannu sempre 'nu pardiu de tastu

' A cosa nu' sse conza, ma se guasta!

rastu : fiuto

Botta (scrive Caruso)

 Cc'era'nnu pitinusu

 Chi, mparu l'accuria

A Battista Carusu

Ppe' cunsigli curria.

' Na vota a 'su mischinu

Dissi de me mannare

'Na vummula de Vinu;

Ma sempre ccu ppagare.

Edi passatu n'annu

E nnu' mm'ha cchiù scrivutu

Ancore sta ttrimannu

Ppe' ru cacacchiu avutu!

 E cchissa fo' ppagura!

Amicu cujjintaru,

Hai fattu 'na figura

 De veru cacaturu!...

23 settembre 1923