'U specchiu 'e 'nu varvieri 'n fallimentu,
De notte, a nu catuoju fo' ammucciatu
Ppe' ru sarvare d''o pignuramentu.
Sintiennu tanti scrusci d'ogne llatu
Disse :- Madonna mia, quanti rumuri!
Va vide dduve sugnu capitatu!
Ma quannu s'àddunau, a ri primi arburi,
Ca 'ntuornu avia 'nna mandra de muntuni
Ccu re corne a ffaciglia 'e mietituri.
- Menu male! - diciu rassicuratu.
- Haiu sulu de zàccanu canciatu -
2 ottobre 1939
All'Avv. Antonio Mastroianni Conflenti
I sordi su' 'nna mala tantazione
Spariscenu a ru minimu Jujjune
E puru ca nu' si' scialacqune
Parica tienu 'n cuorpu 'a dannazione.
Eccu ppecchì dde nuovu ppe' prudenza,
Pagu e ringrazziu prima d''a scadenza!
27 sett. 1939
' U munnu s'è ccussì 'mputtanisciutu
Chi, cum'è bberu Ddiu, riestu 'ncantatu.
Vicienzo fuballista è ddivinutu
E Cicciu a ssissant'anni è 'nnamuratu.
Saveriu pisce d'acqua s'è ffaciutu,
Vittoriu va scapilli ed è ppilatu,
Michele de cudilla s'è cchjcatu
E Ddo Riccardu 'e nieru s'è bbistutu.
Ma 'nsumma, cchi ppe' crivu è ssuccidutu
'U munnu capisutta s'è bbutatu
O sugnu iu chi 'a vista haju perdutu?
Ccu ttutta quanta 'a forza ch'haju avutu
Stamatina me sugnu scaffijatu
Ed haiu dittu; o sieculu curnutu!
14 settembre 1932
Pippì, si nu' mme dici cumu e quantu
'Un te capisciu supra nullu puntu.
Cchi cc'intradi ccu mie Ddon Carru quintu
Si 'ud'amu avuti mai nisciunu accuntu?
se vide ca 'u' sai cchiù cumu me chiamu
E mme cumpunni ccu Franciscu Primu.
- Gnornozignore! - Allura cc'è 'nnu spagliu
-Gnorzisignore. - Allura tantu miegliu!
E bbide mu se fà ppuru capace
L'amicu caru nuostru Ddo' Lluice.
29 agosto 1935
Pippì: Peppino Casalinuovo
Luice: Luigi De Franco
Gualu, cumpagnu è ru distinu nuostru:
Nnabbiviramu tutti dui de ''nchiuostru.
Ma 'na pinnata de Vussugnuria
Nne vale ccientumila de 'na mia!
22 agosto 1935
'N'apa supra 'nu jure 'e margarita
Firmau ru vuolu pp'arrubbare 'u mele;
Ma cce truvau 'nna lacrima de fele
E cce appizzàu ra vita.
' A gente disse: - No supra 'stu jure
L'apa si cce ppusata
Surtantu pped'amure;
Si nn'era 'nn'ammurata.
Ccussì ri furti cchiù qualificati
Pàssanu pped'amuri spurtunati.
3 agosto 1935
Apizzau: perse
Dopo l'avvenimento
Del dodici per cento
Ognuno chiama il Duce,
A ragione, il Riduce.
28 gennaio 1932
' Mpitta a 'nnna corda. 'na cammisa janca,
Ogne ttantu s'abbuffa a ru libbicce;
S'ujja dde vientu. 'E maniche spalanca.
E ru munnu è ru miu, parica dice.
Ma 'mparu chiru vientu cchiù nnun jujja
'A cammisa, a 'nna botta, se dijjujja.
Vascia re vrazza , 'e due fadelle stenne
E mmuscia muscia 'e chira corda penne...
30 giugno 35
Cortile di Trilussa
All'Avv. Luigi De Franco
Caru Luice, basta!
E ddice a cchir'amicu ca 'ud'ha rrastu:
Tuccannu sempre 'nu pardiu de tastu
' A cosa nu' sse conza, ma se guasta!
rastu : fiuto
Cc'era'nnu pitinusu
Chi, mparu l'accuria
A Battista Carusu
Ppe' cunsigli curria.
' Na vota a 'su mischinu
Dissi de me mannare
'Na vummula de Vinu;
Ma sempre ccu ppagare.
Edi passatu n'annu
E nnu' mm'ha cchiù scrivutu
Ancore sta ttrimannu
Ppe' ru cacacchiu avutu!
E cchissa fo' ppagura!
Amicu cujjintaru,
Hai fattu 'na figura
De veru cacaturu!...
23 settembre 1923
