Contatti

domenica 14 marzo 2010

Piscicani -Pescicani



    Ddiu nne scampi,
‘Na matina,
Truoni e llampi,
 Se scatina
‘Nna chiuvuta
Mai viduta.

   Franciscu ch‘hadi all’aria
‘U granu de pisare,
Ppe’ ru dulure ciancere
Se sente e ddispirare.

  ‘E rane, mmece, godenu
E ‘n core fanu festa;
D’ogne ppantanu gridanu:
Ebbiva ra timpesta!

Cumu Franciscu, ciàncedi
Chi tene figli ‘n guerra;
Cumu ‘sse rane, ridenu
I piscicani ‘e… terra!

giovedì 11 marzo 2010

L'uomini e ru passaru - L'uomo e il passero



‘Nu pàssaru, pusatu
Supra ‘nu pede ‘e nuce,
‘Stasira, m’ha ccantatu,
Ppe’ spogu,‘sta canzuna, a mmenza vuce:
-‘Un c’è cchi ddire, l’uomini
Siti ‘na vera pasta ‘e galantuomini!
Fina ch ‘ogne mmatina
Ve fazzu ‘na cisina
De viermi, nu’ bbe dicu
Quantu ve sugnu amicu!
De mie nun c’è ru gualu
E ‘nnu trisuoru valu!
Ma si ‘na vota sula, arrassu sia,
Me cùogliu de ‘ssu chianu
‘Nu cuccillu de granu
Jittatu ppe’ ssimente a ra spurìa,
Allura cchiù bbrigante
Divìentu ‘e Passannante!
‘Un c’è cchi ddire, l’uomini
Siti ‘na vera pasta ‘e galantuomini! -

mercoledì 24 febbraio 2010

'u tamarru e ra serpa -Il bifolco e il serpente

‘U tamarru’ e ra serpa


Criju ca vinn‘aviti ‘e ricurdare:
‘Na vota ‘nu tamarru corazzune,
Vidìennu ‘nu curzune
Chi stava ppe’ spirare,
‘U ‘mmiviscìu, dunànnule riciettu
Intra ‘na rasa ‘e piettu.
Ma chiru scilliratu
(Quannu dici curzune!)
‘Mparu pigliàudi jatu,
‘U capu muzicune
Le dezedi vicinu
A cchira minna, dduve avìa ppusatu
‘A capu ppe’ cuscinu!
E sì nu’ffora statu
Ca ‘nu bbuonu varvieri,
Praticu d”o mistieri,
Le fucàu ra firita,
Cce appizzava ra vita!
Pped’ogned’àutru,
‘ssa lizzione amara
Avèradi giuvatu;
Ma ‘nu tamarru, capituostu natu,
Pate e ‘nnu ‘mpara!
‘Mpatti, cumu vidìu ‘nna ciucciarella
Chi s’era a ra capizza ‘ncatturata
E stava, ppovarella,
Ppe’ scigulare de ‘na pinninata,
A ru ‘mpàru currìu ppe’ ra tirare;
M’ ‘a ra squatricijata
Chi chilla fice,‘e ‘n terra ppe’ s‘azare,
Le sparàu, nnu’ bbulennu,‘na cucchiata
De cauci a re vudella
E cce appizzau ra pella.

Ad aiutare i mali sunu guai:
M’ad’aiutare i ciuoti è ppieju assai!

domenica 21 febbraio 2010

'U tapinaru - La talpa

Quannu nun potte ffare cchiù a r’allutta
Pper’amara campata,
‘Nu tapinaru se scavàu ‘nna grutta
Sutta ‘nu surcu ‘e nnianu abbiviratu.
Pue disse: Mo chi sugnu cruovicatu,
E ccu ru munnu l’haju rutta,
De tutti quanti criju ca lassatu
Sugnu ‘m pace cca ssutta.
Fina chi praticai
Ccu ttapinara ggente, parivi ‘nu parente
De cumpari Pasquale Passaguai.
Quanti danni,
Quanti affanni,
Tutti l’anni
Chi passai!
Sienti e ttrema: avìa ‘nna cuda
Cumu chilla de l’aglire;
Ma ‘nu lazzaru, ‘nu Juda
(Vi’ chi barbaru piacire!)
Ccu ‘nna lama de curtiellu,
Longa tanta e azzarijata,
Me l’ha ‘sùbbitu curciata
Ppe’ cce fare ‘nu pinniellu!
Chissu è ‘nnente; Avìa ‘nnu paru
D’uocchi tanti, sprunillati.
‘Na matina m‘affruntaru
‘Na pariglia de dannati
Chi pigliaru
E mme ‘ncicaru
Sulamente me lassaru
Ddue puntille tante d’acu
Mu de chiantu me divacu
E mmu viju ‘e porcarie
Chi se fanu ‘sse vavìe.

Ma ‘nu bbasta. Due briganti,
(A ‘stu munnu cci nn’è ttanti)
Me muzzaru a ttradimientu,
‘E due ricchie nummu sientu.
Ma s’è bberu ch‘ogne guerra
Trova rrequie sutta terra,
Mo chi sugnu cruovicatu
A ‘stu chianu abbiviratu,
Ve dispiace,
O tapinari,
De me fare
Ripusare
‘N santa pace?

Nonzignore! ‘N’uortulanu
Chi vidìa mmuotichijata,
Surcu surcu de nnianu,
Chira terra abbivirata,
Le calàu, dde tutta forza,
‘Na pardiu de zappunata
E ru ficedi a ddue morza.

Unu si nne vinìu ccu ru zappune,
L ‘àutru ristau ppe’ ssuvaru
‘Mpilatu a ru cupune .


Glossario
allutta : lotta
surcu: solco
'nianu: grano turco abbiveratu:innaffiato cruovicatu : sepolto

giovedì 28 gennaio 2010

‘U cristariellu e ru varvajanni

‘U cristariellu e ru varvajanni



‘N’aggiellu de rapinu

Chi ‘mmita ‘nn‘avìa ffattu

Cchiùd’illu ‘e Gesufattu,

‘Nu juornu, a ‘nnu cardillu

Chi le pusau bbicinu,

Disse ca, ‘mpore d’illu,

L’aggielli tutti quanti

Sunu veri briganti.

- Cc’è cchillu chi arrapina;

Cc’è cchillu chi assassina;

Ppe’ ddignità de razza.

S’ha dde truvare ‘a via

De fare pulizzia

De tutta ‘ssa famazza.

Disse ru varvajanni:

- Gnorzì; ma vussurìa

Cchi aspietti mu te scanni? -

lunedì 25 gennaio 2010

'U cane e ru gattu


‘U cane e ru gattu


‘Nu cane priputente
 Avìadi qualiratu
‘Nu povaru pizzente
De gattu scangalatu.

‘U judice,
‘Nu surice
 Ttugatu
Ma pagatu,
pp’ ‘un  scuntintare ‘u cane
Chi le dunava ppane,
Le dèzedi trent’anni de galera
Cumu ch”a morte a cchiri tiempi ‘un c era.

Ma, ‘nsumma, chiru gattu
Cchid’è ch’avìadi fattu? -
Addimmannàu, bbiscannu,
‘Nu mierulu a ru nannu.
Ah, ‘nu dilittu granne!
S’era mmintutu ‘m mente,
Viditi  chi ‘mprudente,
De le rumpìre a chillu cane ‘e zanne.
E quantu li nn’ha rrutte?
Una? Sett’uottu? Tutte?
Mancu ‘na menza - E ppoca,
Sulu ppecchì bbulìa!
-Gnorzì, bbillizza mia -

Vide ‘nu puocu tu
Cchi llegge chi cce fò...
Ringrazziu Ddiu ca mo
Sse cose ‘u’ sse fàu cchiù!...
                                   

Glossario:
qualiratu : querelato
scangalatu: senza denti



martedì 19 gennaio 2010

'u massaru e r'aggielli



  Ppe’ sìmminare granu,
Massaru ‘Ntoni, ara
‘Nna vecchia patatara
Siccagna’ de ‘nu chianu.
   Ppe’ ttutta ‘na jurnata
 Ha ll’anima jittata
 E nnullu ha ddittu: oi!
‘A fatigata è stata
‘A sua e dde chiri voi.
‘U’ ddicu ca l’aggielli
L‘avìenu d’aiutare;
Gnornò! Quannu se nasce ccu r’anielli,
Unu ‘u’ sse po’ allurdare...
M’armenu mu l’averanu, ogne ttantu,
Cunzulatu, ppe’ Jjuda. ccu ru cantu!
 Nente! - Suda tu sulu -
L‘hau ddittu zerti pàssari manciuni.
-‘Mpumera  sulu tuni,
Sìmmina, zappulija,
 Abbìvira, nittija,
 Cà nue vinimu sulu a tte truvare
‘St’astate, a ru pisare! 


Glossario:
faticata: lavoro
voi: bue
allurdare : sporcare
hau : hanno
'mpumera : concima (verbo)
abbivira: innaffia
nittija : pulisce
zappulija: zappa
astate: estate

 



sabato 9 gennaio 2010

'A gatta ripintuta

‘A gatta ripintuta





A ‘nna pagliara vecchia de ristucci

Durmìa ‘nna canicella - Cucci, cucci -

Dìsseru ffore: - Chine sì? - ‘Na gatta.

-Chi tt’accurre? - ‘Na grazzia vorra ffatta.

-Tuni? De mie? - Gnorzì, cà ‘nu nimicu,

Zerte vote è cchiù bbuonu de ‘n‘amicu!

-Poca, dice cchi bbue. De cchi sse tratta?

-Vorra ‘nn‘ugna riciettu,

Ch’haju ‘nu malu affannu intra ‘stu piettu.

Oh ppovarella! ... Ma si’ ssempre latra,

Maligna, vacabbunna e traditura?

Ancòre raschi ‘a gente chi ‘un te quatra?

Ancòre minti i surici a tturtura?

Ancòre, ‘mparu scura,

Girijj ceramili ceramili,

Cardannu lane e scarminannu pili?

- Gnornò! Sugnu mutata...

-Daveru? E ccum’è juta?

Me sugnu stracancìata...

Me sugnu ripintuta...

Mo, sugnu bbona e ccara...

Allora, trasitìnne a ra pagliara –

Ccussì ddiciennu rapirìu ra porta;

Ma se truvau ‘nna gatta facce e ffrunte

Spinnata, reganusa,’ menza morta

Scuontricata e rrugnusa...

-Madonna! - Disse ll’àutra, sbalurduta

Cum ‘è bbrutta ‘na gatta ripintuta! –


Glossario:
ristucciu: stoppia
Poca: allora
n'ugna: un po'
riciettu: ricovero
raschi : graffi
quatrare: piacere
surice: topo
scura : fa buio
ceramile: tegola
scarminare: spelazzare (fig.: girare oziando)
stracangiare: cambiare molto
trasire: entrare
raperire : aprire
spinnata: spelacchiata
scuontricata: piena di piaghe

giovedì 7 gennaio 2010

'A nanna e ra nipute


‘A nanna e ra nipute


  Cc’è ‘nna nanna e ‘nna nipute
Chi a ‘stu munnu su’ bbinute
Ppe’ mmustrare ca parienti
Sulamente su’ ri dienti!
 Ssi campiuni, paru ffatti
Usu cani ed usu gatti.
Ogne ttiti  sunu liti.
Mò se lànzanu bicchieri,
Monì cuti de sazieri.
 E’ ‘nna cosa chi ‘u’ sse cride:
S’una ciance, l’àutra ride:
S’una ammuta, l’autra parra.
Va ed accorda ‘ssa catarra.
   Fà ra nanna: - Allupillata!
Tuni m’hai de rispittare! -
‘A nipute: - Pûe cripare:
Ma ‘u’ ra vidi ‘ssa jurnata! –
   ‘U mumentu ‘ud’è lluntanu
Chi se dùnanu de manu
E ssi arrivanu a ‘ssu puntu,
Nn‘haju cose mu ve cuntu!
  Viju mo ‘sse lonze brutte
Vilinuse e nnaschistritte
Ccu re capu menze rutte
E re facce vitte vitte.
Niuri e jjanchi già me pare
De vidìre vilijare
L‘ariu l’ariu, ppe’ ffamazze.
I capilli de ‘sse pazze!

‘Na nanna chi se ‘mbriga
Ccu ra nipute prova
Ca ‘un puotu ffare liga
Fravica vecchia e nnova!
                                                                                           




mercoledì 30 dicembre 2009

Suonnu de fata

Suonnu de fata


     Sutta ‘na pagliarella d’ogne jjure
Riposa, a ra cuntrura, ‘na quatrara.
Tene bbint’anni e ra facciuzza chiara
Le rìdedi d’amure.

    Canta ra primavera e ll’accumpagna
‘Nnu coru de cardilli, ‘n luntananza.
D’ogne rrosa chi crisce a ra campagna
Alita ‘nna spiranza.

        ppe’ cchira pagliarella, senza posa,
 De pùlluIe gìrija ‘nna murrata
 Cade ‘n frunte, ogne ttantu, a cchira fata
‘Na pàmpina de rosa.